Pilersuisoq Kangaamiuni pilersuinerluppoq

Pilersuisoq pilersuinngilaq. Kangaamiuni nioqqutissat ulluinnarsiutit, soorlu naatsiiat, qajuusat, equutissiat, iffiat, iffiaq-qaqortut, amigaatigineqartuarnerat innuttaasut qatsuppaat. Illumi ningiu Jensine Christiansen isumaqarpoq, piaaraluni nunaqarfinnik ajornartorsiortitsisoqartoq.

-Annerusumik naatitat, naatsiiakkut allallu naatitat, amigaataasorugussuupput. Tamakkuinnaanngillat: Quajuusakkut, seqquluttut, soorlu assigiinngitsut amigaataasaqaat, iffiakkut, qaqortuliakkut, takanani bakeoff-imi iffiortagaat. Soqanngilaq.

Qanormi iliortarpisi?

-Maniitsuliartussanut imaluunniit aggertussanut kammaqarniaalulertarpugut. ”Taakkuninnga pisilaartigut?”. Taamaaliorneq nuannerpallaarneq ajorpoq, nunaqarfimmiuulluni. Allatut ajornartumik taamaalioniartariaqaratta. Taamaaliussanngikkutta toqqortuinersuaq sivisooq atorlugu pilertarparput, ukiussamut peqarniarusulluta.

Qanoq ippa taama inuuneq?

-Soorunami inuuneq ingerlavoq, kisianni uanga uperuarusutara anneq uaniippoq, soorlu ilaa allaanngiveqqissaarami nunaqarfimmi inuuneq ajornarsiornarsitinneqariartortoq, qulliunerusuninngaanniit. Uanga kanani KNI-mi pisiniarfimmi sulisut annerusumik pisuutissinnaanngilakka una pillugu: Bestiliigaluarunik ilaatigut takkutinngitsoornerartarpaat, taavalu ilaatigut listiminngaanniit piiarneqartut tusartarlugit bestilersinnaajunnaarpagunnngooq, soorlu tamakku oqaatsit tusartarpagut.

-Allaanngilaq nunaqarfinni inuuniarneq ajornakusoorsiartortinniarneqartoq. Oqartoqanngilaq nunaqarfimminngaanniit aallarniaritsi, kisianni nuanniilliartortarpoq taama aporfissarpassuit pileraangatsigit, nerisassat tungaatigut.

Jensine Christiansen taama oqarpoq. Pilersuisoq-mit oqaaseqartitsiniaraluaratta iluatsitsinngilagut. Nioqqutissanik pilersuinerup amigarnera radioavisimi unnugu sammeqqissavarput.