Pilersuisoq Atammimmi niuertarfittaarpoq

Allattoq Carla Davidsen
oktobarip 11-at 2005 11:39

Pilersuisup nunaqarfinni niuertarfimmi nutaanersaat Atammimmi sapaatiummat atoqqaarfissiortippaa.

Niuertarfik Atammiup qeqqani inissisimavoq – aalisakkanik tunitsiviup, talittarfiup aamma utoqqaat illuata qanitannguaniilluni.

Niuertarfik iffiorfeeraqarpoq, Atammik iffiukkanik qalarlaanik pilersorsinnaallugu, atisaarniarfeqarpoq aamma angisuumik niuertarfeqarluni.

Atammiup niuertarfitoqaata ilaa siorna marsimi ikuallappoq, taamaammat Pilersuisoq aalajangerpoq allamut inissillugu niuertarfimmik nutaamik sananiarluni, pisariaqartitsineq naapertorlugu allilerneqarsinnaasumik.

Niuertarfik taanna nutaaq 7,5 million koruuninik akeqartoq, Pilersuisoq ilisimatitsivoq. Niuertarfik nunaqarfiit akornanni nutaaliaanersaavoq, siunissamilu niuertarfiliarineqartussanut ilaatigut nalerarineqassalluni.

Niuertarfik sapaatiummat ammaanersiorneqarmat nunaqarfimmi innuttaasut kaffisortinneqarput, tiitortinneqarlutik kaagisortinneqarlutillu, meeqqat pullattakkanik sukkuaqqanillu tunineqarput – ammaanersiornermilu aaqqissuussineq ussatigineqarluarpoq.

Niuertoq Jensigne Josefsen pitsaasumik aaqqissuussivoq, nunaqarfimmilu aqutsisut siulittaasuat Maniitsullu Kommuneani borgmesterip tullersortaa ammaanersiornermi oqalugiarput.