Fontain: Pilersaarut ingerlavoq innuttaasulli peqataatinneqassapput
Peqqissutsimut naalakkersuisup, Agathe Fontainip, Naalakkersuisut hashi akiorniarlugu nuna tamakkerlugu siorna pilersaarummut innersuussutigalugu akiuiniarnertik erseqqissaatigaa.
Innuttaasulli peqataatinneqartariaqartut isumaqarpoq.
- Uagut Naalakkersuinikkut iliuuseqarsinnaavugut, periusissiortaqattaarsinnaavugut. Innuttaasut peqatiginngikkutsigit periusissiarput arriitsuararsuarmik sunniukkiartussaaq, Agathe Fontain oqarpoq.
Naalakkersuisulli haship akiornissaanut 2016-imi pilersaarusiorput.
Pilersaarullu iliuusissanik peqqissutsimut, ilinniartitaanermut, inatsisinut atuutsitsinermut akileraartarnermullu aqutsisoqarfimmut tunngasunik 25-nik imaqartoq pilersaarutaasutut suliarineqartoq, Agathe Fontain oqarpoq.
- Pilersaarutit iluanni taakku aningaasassaqartitsiviata iluani ingerlapput. Pilersaarutit ilaat kinguaattuulaarsinnaapput, kisianni tulleriiutaarlutik piffissatillu tunngavigalugit ingerlapput.
Iliuusissani peqqissutsimut tunngasuni 17-iusuni ilaatigut atornerluisut katsorsarneqarnissaannik neqerooruteqarneruneq, oqarasuaatikkut siunnersuivimmik pilersitsineq ikiaroornartumillu atornerluinerup akiornissaanut nunarsuaq tamakkerlugu ullorititap malunnartittarnissaa naammassineqareerput.
Iliuusissalli ilaat kigaallaqqapput.
Soorlu atornerluineq pillugu inatsisiliorneq 2018-imut kinguarpoq paasititsiniaanermullu iliuusissat pingasuusut, kinguartooqqapput.
Ilinniarfinni iliuusissaq, tassalu ilinniarfinni kollegianilu ikiaroornartumik atuisoqarnersoq misissuisarnissamut siunnersuut, tunuartinneqarpoq.
Akileraartarnermik aqutsisoqarfimmit iliuusissatik sisamaasut, tassalu mittarfinni nakkutilliineruneq, timimut scannerummik pisineq, ikiaroornartumik suussusersiniarnermut atortussanik pitsaanerusunik pisineq akitsuuserisullu angalanerunissaat tamaasa naammassereeritik KNR-imut paasissutissiissutigaat.
Inatsisinut atuutsitsinermi iliuusissat pingasuusut suli naammassineqanngitsut, inatsisinut atuutsitsinermut naalakkersuisoqarfimmit KNR-imut paasissutissiissutigaat.
Pinerluttulerinermi inatsit Danmarkip akisussaaffigaa, taamaalillugulu aamma allanngortinnissaa, Kalaallit Nunaanni Eqqartuussiveqarneq pillugu Siunnersuisoqatigiit ataanni suleqatigiissitaliaq suli pilersinneqanngilaq isertitsivimmiittullu katsorsarneqarnissaat kimit akisussaaffigineqarnersoq maanna oqallisigineqarmat, suliaq taanna suli naammassinngilaq.