Pilersaarusiornermut Kalaallit Nunaat sunniuteqarluarpoq
- Danmarki eqqaaneqaraangat, Kalaallit Nunaat aamma pineqartartoq qularutissaanngilaq, Tove Søvndahl Pedersen oqarpoq.
Naak Kalaallit Nunaat nunap inoqqaavinut tapersersuiniarluni suliniarnermi peqataatinneqarluaraluartoq, danskit tapersersuinerat Kalaallit Nunaanniit eqqarsarnartoqartinneqarpoq. Taakkulu ilagaat nunani allani, nunap inoqqaavisa pisinnaatitaaffiinik akuerinninngitsunik naalakkersuisoqartoqarnera.
- Nunat ilaanni taamaattoqartillugu, nunap inoqqaavinik ikiuiniarneq iluaqutaavallaarnavianngilaq. Nunap inoqqaavisa pisinnaatitaaffiinik akuerinninnissat anguniarneqaqqaartariaqarput. Kalaallit Nunaanniillu, nunat issittormiuusuni nunap inoqqaavi, ingammik Ruslandimiittut tapersersorneqarpiannginnerat ernummatigineqarpoq, Tove Søvndahl oqarpoq.
- Annilaangatigisatta anersaasa ilagaat nunap inoqqaavisa nunani ineriartortitsiviusunituulli tapersersorneqaratik ingerlanneqarneri, taakkuugajuppullu nunani issittuni nunap inoqqaavi pingaartumillu Ruslandimi nunap inoqqaavi ineriartuutissanik taperserneqarsinnaanngitsut, Tove Søvndahl oqarpoq.
Isumasioqatigiinnermi, Danmarkip nunap inoqqaavinut tapersersuinera pillugu naliliisoqarpoq. Nalunaarusiaq danskit nunanut allanut ministereqarfiata Namminersorlutillu Oqartussat suleqatigiillutik suliaraat. Nalunaarusiamilu danskit kalaallillu akornanni oqallittarfissamik pilersitsisoqarnissaa, ilaatigut isumaliuutissiissutigineqarpoq:
- Inuit nunap inoqqaavi pillugit suliaqartut, kiisalu nunanut allanut ministereqarfimmeersut ineriartornermik suliaqartut peqatigalugit ataatsimoorlutik naaffeqarsinnaanissaat pingaaruteqartorujussuuvoq. Taamaasillunilu aamma danskit kalaallillu nunap inoqqaavi pillugit suliniarnerminni ataqatigiinnerulersinnaammata,Tove Søvndahl oqarpoq.
Air Greenlandip timmisartorsuata ippassaq kinguaattoornerata kinguneranik Naalakkersuisut siullittaasuat Kuupik Kleist isumasioqatigiinnermi peqataanngilaq, Tove Søvndahlillu sinnerlugu oqalugiarpoq.