Pilatsinnissaminnut utaqqisut ikiliallapput

Seeqqut tuiillu pilattartinnissaannut utaqqisut ikiliallapput. Inuit utaqqisut 28-nik ikiliallapput, nakorsat pilattaanerit Nuummi pinnagit Ilulissani suliarisalermatigilli. Ilulissanimi pilattaasarfeqarpoq nalinginnaasumik atorneqanngikkaluartumik. Taamaalillutillu nakorsat akornusersorneqaratik pilattaasinnaalerlutik. Nuummi amerlanertigut akornusersuutit pisarput init pilattaasarfiit pilattaanernut tuaviuuttariaqakkanut atorneqassatillugit. Ilulissanili nakorsat suleqatigiillutik ulluni 14-ini akornusersorneqaratik pilattaasinnaasimapput.

Aatsaat siullermeersumik sinerissami napparsimmavimmi pilattaanerit taamaattut ingerlanneqarput. Saarngit pilattarnerannut pilattaanermullu nakorsaaneq Lars Simper angusarineqartut pillugit naammagisimaarinnippoq siunissamilu Ilulissani pilersaarutit taamaangajattut suliarineqartarsinnaanissaat takorloorlugu.

Peqqissaaveqarfimmi nakorsaq Eskild Bueskov aamma isumalluarpoq:

-Pilattaasarfiup aappaa kisiat ulluinnarni atortarparput. Taamaallaat immaqa pilattaanissanut sakkut nutaat pissarsiarisariaqassapput, saanertigut pilattaanissat ingerlaavartumik ingerlanneqalissappata, tassami nakorsat immikkut paasisimasallit atortuisa angallanneqartarnerat akisoreeqimmat, peqqissaaveqarfimmi nakorsaq taama KNR-imut oqarpoq. Aammattaaq siusinnerusukkut Ilulissani siutinik isinillu pilattaanerit ingerlanneqartarsimapput, taama oqarpoq

Peqqissaanermut ikiorti Judithe Maqe suleqatigiinnut, tassaasunut sinitsitsinermi nakorsamut ataatsimut napparsimasunillu paarsisumut pilattaasumut ataatsimut napparsimasunillu paarsisunut pilattaasartunut marlunnut ikiuunnermini ulapaarsimavoq.

Pilattartittut aamma naammagisimaarinnilluarput seeqqutik nunamut allamut aallaratik pilattartissinnaagamikkik.

-Ullorpassuit atornagit pilattartissinnaagama nuannaarpunga, Conny Ostermann Søholm Aasianneersoq oqarpoq.

Aammattaaq Qanorooq unnugu takuuk.