Tasiilami eqqartuussivimmi suliaq: Pikunneqartoq, kapineqartoq toqunneqartorlu

Arnaq 43-nik ukiulik uiminut paniminullu ukiuni arlalinni nakuusertarsimasutut unnerluutigineqarpoq. Angut ukiup ataatsip matumani siorna toqutaavoq. Eqqartuussivimmi suliaq annertooq maanna aallartinneqarpoq.
Arnaq 43-nik ukiulik unnerluussissussaatitaasup oqarnera naapertorlugu uiminut paniminullu nakuusersimavoq. Assi © : Merete Lindstrøm, KNR
Allattoq Liv Almer
marsip 20-at 2023 09:57
Nutserisoq Connie Fontain

Eqqartuussivimmi suliaq utaqqineqartuarsimasup, arnamut 43-nik ukiulimmut Tasiilameersumut, uiminillu puttut savillu atorlugit toqumik kinguneqartumik kapisisimasumut tunngassuteqartup suliarineqarnera ullumi aallartippoq.

Siorna januaarip pingajuani Tasiilami inissiami angut kiinnamigut assammik eqissimasumik annersarneqarluni qinngamigut aatsinneqaqqaarpoq.

Angut tamatuma kingornatigut puttummik tuimigut, talimigut nissumigullu kapineqarpoq, kingornatigullu sakissamigut pingasoriarluni savimmik kapineqarluni toquvoq. Tamanna aanaassutigingaatsiaramiuk toqqutigaa.

Suliarlu aamma immikkut ittumik ilungersunarluinnartuusoq, unnerluussisussaatitaasoq, Alexander Stürup, KNR-imut erseqqissaavoq:

- Pinerluttuliornermik suliani ilungersunanngitsoqanngilaq. Kisianni toqutsisoqarneranut atatillugu suliat qanorluunniit isigineqaraluaraangamik pinngitsooratik pinerluttuliornerusarput, taanna oqarpoq.

Arnap piffissami killiligaanngitsumik tigummigallagassanngortinneqarnissaa unnerluussisussaatitaasut piumasaraat.

Ukiuni arlalinni pisartut

Pisut alianartut siorna ukiup aallartinnerani pisut toqutaasup unnerluutigineqartullu angerlarsimaffianni eqqissiviilliortoqarnermi siulliunngilaq.

Politiit ornigutsitaagajupput, unnerluussissummilu nakuusernermi pisorpassuit aamma ilaapput.

Arnaq inummut niaquatigut assammik eqissimasumik arlaleriarluni annersitsisimasutut 2020-mi aggustimi unnerluutigineqarpoq.

Nakuuserserit 2021-mi upernaap aasallu ingerlanerani pigajupput.

Arnap angut kingorna toqunneqartoq siutaatigut tuiatigullu savimmik kilertissimagaa apriilimi unnerluutigineqarpoq. Arnap pisumi tassani angut kiinaatigut qitsussimavaa, nakuusernerlu atorlugit illumit anisinnaajunnaarsillugu niumini nikinnaveerseqqasimavaa talialu qitianut qissatseqqasimallugu.

Qaammatialuit qaangiuttut juunimi arnaq angummut arlaleriarluni assammik eqissimasumik annersitsisimasutut, tamatumalu kingorna angut uppitillugu qalluatigut kilertillugu mersortittariaqartussanngortissimagaa unnerluutigineqarpoq.

Qaammatit marluk qaangiuttut politiit aggersarneqaqqipput. Tamatumuuna arnap uia ajoqusersimanngilaq. Unnerluussisussaatitaasut oqarnerat naapertorlugu arnap panini inersimasoq kiinaatigut qitsussimavaa nujaartorlugulu.

Unnerluussisussaatitaasulli, Alexander Stürupip arnaq siusinnerusukkut pineqaatissinneqarsimanersoq oqaatigisinnaanngilaa. Tamannali eqqartuussivimmi suliap ammasumik ingerlanneqartup ingerlanerani saqqummiunneqarumaartoq erseqqissaatigaa.

Ataatsimut meeraat sisamat 18-it inorlugit ukioqartut

Arnaq unnerluutigineqartoq angullu toqutaasimasoq unnerluussisussaatitaasut oqarnerat naapertorlugu sisamanik 18-it inorlugit ukiulinnik meeraqarput. Meeraannit pingasut apersortittussat ukiuisa missaannik ukioqarput. Tamatumalu saniatigut arnaq angullu immikkut inersimasunngoreersunik aamma meeraqarlutik.

Meeqqat pissutigalugit arnap akiliuteqartussanngortinneqarnissaa tassa aningaasanik meeqqanut sisamanut ukiukitsunut immikkut 100.000 koruuninik taarsiissuteqarnissaa unnerluussisussaatitaasut piumasaraat.

Ilanngullugulu meeqqat sisamat ilinniarnerannut apersortinnerannullu arnamit unnerluutigineqartumit tapiissuteqartoqartitsisoqarnissaa aamma piumasarineqarpoq.

Oqartussat meeqqanut isumaginnereersut, Alexander Stürupip erseqqissaatigaa:

- Meeqqat taakku isumagineqarput. Kisianni angajoqqaatit tamarmik soorunami annaavaat, taanna KNR-imut oqarpoq.

Taassuma oqarnera naapertorlugu arnat nakuusernikkut inatsisinik unioqqutitsisarnerat nunatsinni qaqutigoortuuvoq:

- Nunatsinni arnanik paarineqartussanngortitanik eqqartuussaqartoqarsimanera ilisimanngilara. Tamannali qulakkiivillugu oqaatigisinnaanngilara. Siusinnerusukkut pineqaatissiisoqarnikuuvoq, kisianni maannakkuunngitsoq.

Eqqartuussivimmi suliaq Tasiilami eqqartuussivimmi marsip 20-anit 23-anut ingerlanneqassaaq.