Pikkorissartitsisoq: Meeqqat atornerlunneqaratik toqqissisimasumik meeraasariaqarput
Meeraq kiguaassitimigut atornerlunneqarsimasoq, ulloq unnuarlu inissiisarfinniisinneqaleraagat, meeqqap pisariaqartitai perorsaasunit ilaatigut qanoq iliuuseqarfigiuminaassinnaasarput.
- Taamaattumik meeraq atornerlunneqarsimasoq inissiisarfinniilernermini meeqqatut pissusilersorluni inuuneqarnissaa pisariaqarpoq, meerujuusinnaalluni inersimasunullu nillialluni kamassinnaasariaqarluni, taamaalioreernerminilu kiguaassiutitut atoqateqarnissani annilaagagisariaqarnagu.
Tarnip pissusaanik inunnillu isumaginninnermik ilinniarsimasoq aamma ulloq unnuarlu meeqqanut inissiisarsimmi, Pitumi sulisunut pikkorissartitsisoq, Jette Waagner oqarpoq.
- Meeqqap kiguaassiutimigut atornerlunneqarsimasup atornerlunneqartarnini qanoq iliuuseqarfigissallugu ilisimaneq ajorpaa, tassami meeqqamut atornerluisut tassaanerusarmata, meeqqap qaniginerpaasai asanerpaasaalu, Jette Waagner oqarpoq.
Periuseq Marte-Meo pikkorissarnermi atorneqarpoq
Ulloq unnuarlu meeqqanut inissiisarfimmi, Pitumi sulisut, meeqqanik ilaatiut kiguaassiutimikkut atornerlunneqarsimasunik paaqqutaqarnerminni maanna ukiut arlerlugit misilittagaqalereersut pikkorissartinneqarnerminni atorpaat, periuseq Marte-Meo-mik taaneqartartoq.
Marte-Meo tassaavoq perorsaanermut suleriaatsimik periuseq, Hollandimiumit Maria Aarts-imit ineriartortinneqarsimasoq. Periutsip Marte-Meo-p aallaavigaa, meeqqap ineriartornerani, meeqqat ataasiakkaat ineriartortinneqarnerannut taamaatullu meeraanerminni toqqissisimasumik inuuneqalernissaannut aqqutissiuussinermut atorneqartartoq.
Tassalu periuseq tamannarpiaq atorlugu, ulloq unnuarlu paaqqinnittarfimmi Pitumi sulisut ilinniartinneqarneranni, Jette Waagnerip tamanna atorpaa.
- Perorsaasumit meeqqap ikiortariaqqartup ineriartornerata malinnaavigilluarnissaa pigaaruteqarpoq. Taamaaliornermi meeqqamut attaveqalersinnaaneq pitsaasoq anguneqassalluni. Aamma pigaaruteqarpoq sullissisoq inersimasuussasoq ajunngitsoq. Aamma meeqqap meerujuusuunissaa kamassinnaanissalu inissaqartinneqassaaq, taamaalioraluarpalluunniit asanninnermik ajunngitsumik malugitinnissaa pisariaqarluni, Jette Waagner oqarpoq imalu nangilluni.
- Tassalu perorsaasup meeqqamik sullissinermini tamakku pikkoriffigisariaqagai, tassami Marte-Meomik periutsip aallaavigaa meeqqat pisariaqartitai aallaavigalugit sullissinissaq.
Asanninnermik pisariaqartitsineq akeqartarpoq
PItumi perorsaasut ilisimasariaqagaasa ilaat ukuusut, Jette Waagnerip erseqqisarpai.
- Meeqqat inersimasumit pakkunneqarnissaminnik pisariaqartitsisarput, soorlu uangut meeqqagut taama pillugit eqqissisimalersittarigut, meeqqalli ilaasa nalunngilaat, pakkunneqarnissamik pisariaqartitsillugit inersimasoq pakkukkunikku tamanna pinngitsoorani arlaannik akilerneqartariaqartoq. Tassalu tamannarpiaq meeqqat tarnimikkut artorsaatigisartagaat.
Tarnip pissusaanik inunnillu isumaginninnermik ilinniarsimasoq, Jette Waagner oqarpoq erseqqissarlugulu meeqqap pisariaqartitaminut akiliutigisarmagu inersimasumit kiguaassiutitigut atoqateqarneq.
