Pikkorissaaneq iluatsittoq ingerlateqqinniarpaat
Upernavimmiut, Uummannarmiut Iluliarmiullu 75-it pikkorissarnermi off-shore-rimi taasami ilinniartuutigineqarsinnassapput.
Aasianni pikkorissaanerit iluatsilluartumik ingerlanneqareermata, illoqarfinni allaneersut pikkorissarnissamut periarfissinneqarniarput.
- Aasianni pikkorissaasarsimanerit takutippaat offshorimut suliaqartunut, tassa immami uuliamik ujarlerluni qillerinernik suliaqartunik attuumassutillit assigiinngitsunut iluaqutaasimasoq. Taamaattumik periarfissikkusussimavagut Upernavimmiut Uummannarmiut Iluliarmiullu taamatut pikkorissarnissamut periarfissaqassasut.
Inuussutissarsiornermut Naalakkersuisoq Ove Karl Berthelsen taama oqarpoq.
Sapaatit akunnerini aqqanilinni pikkorissaanerit Ilulissani Qasigiannguanilu ingerlanneqassapput.
- Annertuumik tuluttut, aammalu ikiueqqaarnerit, imarsiornermi sillimaniarnerit, aamma struckit kranillu pikkorissaasoqassaaq. Maskinanik pikkorissarnerit assigiinngitsut ingerlanneqartussaapput, taamaalilluni pikkorissaqataasut suliffissaminni tutaani piareersimareernissaat naatsorsuutigaarput.
Ove Karl Berthelsen taama oqarpoq.
Inuussutissarsiornermut aatsitassalerinermullu pisortaqarfiup pikkorissaanissat aningaasalersorpaat.
- Uagut pisortaqarfitsinninngaanniik aningaasalerparput, pissutigalugu nunani immikkoortortani ineriartornerannut pilersaarutinut aallarniutaasutut naleqquttutut isigigatsigu.
Ove Karl Berthelsen taama oqarpoq
nangipporlu:
- Tassa una misiligutaavoq, taamaattumik una iluatsittumik ingerlatsissappat, taava siunissami taassuma ingerlatiinnarnissaa ingerlateqqinnissaalu takorloorparput.
Upernavimmi Uummannamilu aalisakkerivinni sulisut sapaatit akunnerini sisamani pikkorissartinneqassapputtaaq.