Pikkorinnerpaat akissarsitinneqarput

Bachelorinngortut kandidatinngortullu 28-it allagartassatik nalliuttorsiualaarnermi ippassaq tigummatigik, Ilisimatusarfimmut alakkaavugut.

Nuummi Ilisimatusarfimmi ilinniagartuunngorniartut 30-ngajalluinnaat ilinniakkaminnik naammassinnissimanerminnut uppernarsaateqalerput. Bachelorit 23-it kandidatillu tallimat assuussersorsimasut allagartartaaminnik ilinniarfimminni pisortamit ippassaq tunineqarput

Karsten Peter Jensen, inuiaqatigiit pillugit ilisimatusarnermi bachelorinngortoq, taakkununnga ilaavoq.

- Bacheloritut uppernarsaateqalerama uannut iluaqutaassaqaaq. Taanna pigalugu suliffissarsiornissaq ajornannginneerarsuanngussaaq, Karsten Peter Jensen oqarpoq. Taannalu isumaqarpoq, ilinniakkaminik naammassinninerminut Ilisimatusarfimmi atukkat pitsaasut peqqutaasunut ilaasut.

- Manna nuanneqaaq oqalliffiusaqaluni. Qinersinissamut tunngasunik piffissami matumani aaqqissuussarpassuaqarpugut. Taama amerlatigisut akisussaanermik tigusillutik taamaattunik aaqqissuisarmata nuanneqaaq, ilinniagartuunngorlaaq oqarpoq.

Taannali kisimi angusaqarluarusuttuunngilaq. Sulisitsisut Peqatigiiffiat aamma INI nersorinninniutiminnik ukioq-manna karakteriginnerpaanut marlunnut tunniussipput. Nersorniarneqartullu tassaapput Ann Eileen Lennert aamma Mitdlârak Lennert.

Ilinniakkaminnik ukioq manna naammassinnittut siornatut amerlatigigaluartut, maanna naammassisussat akornanni taaamaatiinnartut amerlapput. Rektor Tine Parsip oqalugiarnermini eqqaavaa ilinniartut affaat suli allagartartaaratik tamaatittartut.

Tamaammat nakkaannarsimanngitsut pilluaritsi.