Pikitsitsiniat siuttuat toquvoq

Ruslandimi ujaarineqarnerpaaq – tjetjeniami pikitsitsisut siuttuat Sjamil Basajev – russit sakkutuuinit immikkut sungiusakkanit toqutaasimasoq oqaatigineqarpoq, toqutsinerlu Ingosetien-mi Tjetjeniep ungasinngisaaniittumi pisimanerarneqarpoq.

Beslanimi toqutaasimasut ilaqutaannut pikitsitsisut siuttuata toqunera oqiliallaataaqaaq. Russillu tjetjeniamiunik oqaloqateqaqqissinnaanerannik periarfissiilluni.

Beslanimi atuarfimmik tiguaanermik, inunnillu 331-inik toqutsinermik, taakkunannga affai meeraasunik Sjamil Basajev akisussaasuuvoq.

Basajev-i nammineq pisuuvoq toqutaanerminut Præsident Vladimir Putin oqarpoq. Beslanimiullu isumaqataapput.

Ruslandimiit Poul F. Hansen oqaluttuarpoq Beslanimi pisimasut Ruslandillu sinnerani aamma pisimasut, ajoqisut, Bajasevip toquneragut, naammassineqartutut ittut. Akiniaaneq pingaaruteqarpoq ingammik Kaukasusimi Ruslandimili aamma.

Pikitsitsisut siuttuat Basajev tjetjeniamiullu pikitsitsiniat allat ilagalugit toqutaavoq.

Russit tusagassaqartitsiviat Interfax taamak paasissutissiivoq. Paasissutissat naalagaaffiup Ruslandip isertortumik paasiniaasartuinit FSB-eerput.

Basajev peqqarniisaarniarnerit arlallit ilaaffigisimavai.

Siulleq aqutsisuuffia peqataaffialu tassaavoq Ruslandip kujataani napparsimavimmik tusindtinik sinnilinnik inulimmik tiguaneq. Pisoq taanna inunnik hunnorujunik arlalinnik toqutsiffiuvoq.

Kingorna Osama Bin Ladenipajaatut peqqarniisaarniarnermik aqutsisarpoq namminerli peqataaneq ajorluni.

Peqqarniisaarniarnera kingulleq tassaavoq Beslanimi atuarfimmik tiguaanera.

Basajev-ip toqunera tjetjeniamiunut ingerlaqqinnissamik periarfissiivoq. Basajev Ruslandimiunik oqaloqatigiinnermik akornusiisimammat. Apeqqutaaginnalerpoq tjetjeniami russinik oqaloqatiginnittussamik tatiginartumik peqarnersoq.

Tjetjeniamiulli pikitsitsisuisa akerlianik oqaatigaat Basajev toqutaanngitsoq ajutoornikkulli biilit qaartinneqarnerisigut toqusimasoq.