Pikilluareerluni saqqummersitsivoq
Bibi Chemnitz atisalioraangami, kingumut qivialaarluni, qanga kalaallit atisaliaannut isumassarsiortarpoq. Tamannalu atisaliaani takuneqarsinnaavoq. Nuannarisaasa ilagaat sapangaaqqat avittallu. Taakku isumassarsiffigeriarlugit nutaaliussalluni nuannarisarpaa.
Bibi Chemnitzip saqqummersitassani USA-mi Seattle-mi, kalaallit pingasut nunanilu avannarlerneersut peqatigalugit Nordic Fashion Biennale 2011-mi, saqqummersereerpai. Tamanna piviusunngorsimavoq Islandimiut illuutaata Nunaninilu avannarlerni piorsarsimassutsikkut attaveqaatip NAPA-llu aningaasaliineratigut.
Amerikamut angalaneq misigisaqarfiusimasoq oqaluttuarpoq, tassani kalaaleqatini nunanilu avannarlerneersut atisalioqatini, ilaatigut naapissimavai.
Bibi Chemnitz Nuummi Katuami atisaliaminik ”Looking back to find our future”-mik kalaallinut takutinnissaminut pissangavoq.
- Nuannarutigeqaara atisaliakka Kalaallit Nunaanni takutinnissaanut periarfissinneqarama. Pissanganarpoq aggiasoqarluassanersoq kikkullu aggerumaarnersut, Bibi Chemnitz KNR.gl-mut oqarpoq.
Bibi Nuummi peroriartorpoq. Maannalu ukiut qulit missaat Danmarkimi najugaqaareersimalluni. Herningimilu Teko design & businessimi atisaliortutut ilinniarnikuuvoq. Namminerlu atisaliorneq 2006-mi aallartivippaa.