Pikialaarfik ammaanersiorneqarpoq
Nuummi Katuap saava taaguuserneqarpoq. Tamanna arfininngormat pivoq Pikialaarfimmillu taaguuserneqarpoq. Susanne Pedersen aamma Sussi Berthelsen taaguutissaanik siunnersuuteqarnermikkut ajugaasuupput.
Allattoq Peter Troelsen, Simon Uldum
Katuap saavata taaguutissaanut siunnersuutit 136-t tiguneqarsimapput, arnalli taakku marluk siunnersuutaat taaguusiinissamut suleqatigiissitamit iluarineqarluni ajugaatinneqarpoq.
Kommuneqarfik Sermersuup borgmesteria Aasi Chemnitz Narup tikilluaqqusivoq borgmesterillu tulliata aappata Martha Abelsenip taaguutissaa Pikialaarfik nalunaarutigaa, Katuallu saavata pikialaarfiulluarneranut ilisarnaatissaqqinnerarlugu.