Piitsuunerpaat eqqugaassapput
Silaannaap allanngoriartornerata kingunerisassai pillugit nalunaarusiap saqqummeqqammersup imaa Naalagaaffiit Peqatigiinni silaannap allanngoriartornera pillugu paasisimasalinnit isumaqatigiissutigineqarpoq.
Nalunaarusiamut nutaamut 1.400-nik quppernilimmut suut ilanngunneqarnissaat pillugu nunat tamalaat silaannaap allanngoriartornera pillugu isumaqatigiinniartitaat unnuaq naallugu isumaqatigiinniareerlutik ullaap tungaani isumaqatigiipput.
Nalunaarusiaq manna Naalagaaffiit Peqatigiit nalunaarusiarititaasa pingasuusussat aapparaat, nalunaarusiamilu siullermi silaannaap allanngoriartorneranut inuit pisuunerat isumaqatigiissutigineqarpoq. Nalunaarusiat pingajuat kingullerlu maajimi saqqummiunneqassaaq.
Nalunaarusiami uani silaannaap allanngoriartornerata kinguneri eqqartorneqarput, tassanilu inerniliunneqartunut pingaarnernut ilaavoq; silaannaap allangornerata kingunerinit nunarsuarmi piitsuunerpaat eqqugaanerpaajumaartut.
Silaannaq 0,6 gradinik ukiuni tulliuttuni kiannerulisssangatinneqarpoq, tamatumalu kingunerisaanik, sermit aatsitilerpata imarlu qaffappat Asiami nunami pukkinnerusumiittut Afrikamilu inoqajuitsoqarfimmiut eqqugaanerpaanissaat naatsorsuutigineqarpoq, ilisimaneqarpormi taakku silaannaap allanngoriartornerata kingunerinut illersorniassallutik atortorissaarutitigut akiuussutissatigullu kianguarsimanerpaasut.
Silaannap allanngoriartornera pillugu Naalagaaffiit Peqatigiit nalunaarusiarititaasa pingajuat aaqqiissutissanik imaqartoq tassa maajimi saqqummiunneqassaaq.
