Piisaapilussimasoq

Nukissiorfiit pisortaat Svend Ole Nielsen aningaasarpaassuarnik atuilluni piisaapilussimasoq, Sermitsiaq ullumi saqqummersup allaaseraa.

Allaffini millionit koruunnit affaanik pequsersorsimavaa ingerlatsivillu 650.000 koruuninik nalilimmik biilisissussimallugu. Aamma aningaasarpassuit sumut tamanut atorsimavai Nukissiorfinnut akiligassanngorlugit.

Brasiliamiissimavoq aamma Italiami Milanommiissimavoq USA –miissimallunilu. USA –miinnermini biilimik nutaamik millionip affaa sinnerlugu akilimmik inniminniissimavoq, tamannali Inuussutissarsiornermut Pisortaqarfimmit unitsinneqarsimasoq, Naalakkersuisunut ilaasortap Johan Lund Olsen –ip Sermitsiaamut oqaatigaa.

Aamma oqarpoq, atuisimanerujussuaq akuersaarsinnaanngilluinnarlugu, taamaattumik Svend Ole Nielsen nassuiaateqaqqusimallugu, arlissuarnillu apeqqutissaqarlutik akissutissaqarfigerusutaminnik. Svend Ole Nielsen –lli akissutai naaammagineqanngimmata suliaq ingerlaqqissasoq, kukkunersiuinermillu ingerlatsiviup Deloitte-p suliaq misissuiffigileruttoraa, Johan Lund Olsen oqarsimasoq, Sermitsiaami atuarneqarsinnaavoq.