- Innuttaasut piareersimappata, kommune piareersimappat una suliniut iluatseriarpat anneroorujussuarmik tunniussisinnaavoq, Jens Frederik-Nielsen oqarpoq.Assi: KNR / Jørgen Semionsen

Piiaanissamut akuersissut atsiorneqartoq: Tanbreez aallartissinnaanngorpoq

Aatsitassarsiornermut naalakkersuisoq, borgmesterip tullersortaa Tanbreezillu sinniisua Killavaat Alannguani atsioqatigiipput.

- Siullermik tikilluangaaritsi Kommune Kujallermi siunissami isumalluarfigingaakatsinnut nunamut. 

Kommune Kujallermi borgmesterip tullia Tanbreezip piiaanissamut akuersissuteqarfigineqarneranut atatillugu marlunngornermi atsioqatigiittoqarnerani oqarpoq.

Tanbreez nunatta kujataani aatsitassarsiornissamut akuersissuteqarfigineqartoq Naalakkersuisut qaammatip siuliani nalunaarutigaat.

AAMMA ATUARUK Tanbreez piiaanissamut akuersissuteqarfiusoq: Atsiornissaq amigaataaginnarpoq

Aatsitassarsiutileqatigiiffiup Tanbreez sumiiffimmi 18 kvadratkilometerinik annertussuseqartumi aatsitassanik eudialytinik piiaanissamut akuersissuteqarfigineqarpoq.

Aatsitassarsiutileqatigiiffiup Tanbreezip nunaminertami pilerigineqaqisumi piiaanissaminut piiaanissamut matusinissamullu pilersaarusiamik akuersissuteqarfigineqarnissani amigaatigiinnalerpaa.

Atsiornerpassuit kingorna kiisami iluatsittoq

Atsiornissaq ataaseq aamma amigaataasimavoq, tamannali aatsitassanut naalakkersuisup, Jens Frederik Nielsenip (D) Kommune Kujallermi borgmesterip tullersortaata, Simon Simonsen (Siumut) Tanbreezilli siulersuisuini siulittaasup, Bolette Maqe Nielsenip Killavaat Alannguata eqqaani marlungnornermi atsioqatigiinneratigut naammassineqarpoq.

- Tanbreez misissueqqissaarnissamut akuersissummik 2001-imi tunineqarmalli Aatsitassanut Naalakkersuisuusarsimasut amerlapput, Bolette Maqe Nielsen oqarpoq, nangillunilu:

AAMMA ATUARUK Avatangiisinik illersuisut aatsitassarsiortoqarnissaa kamaatigigaat: Ernumanartorujussuuvoq

- Suliniarluni ulapputtoqarsimavoq, nalunaarusiallu ikigisassaangitsut suliarineqarnikuullutik, sunalu tamaat inissiniarlugu aningaasarpassuit atorneqarnikuupput.

Aatsitassarsiutileqatigiiffiup, Tanbreezip ukiuni arfineq-pingasuni piiaanissamut akuersissuteqarfiginiarneqarnerminut australiamiut dollarsii 50 millionit (225 millionit koruunit missaat) atorpai. 

Asuliinnaanngitsoq

Aningaasalli taama amerlatigisut atorneqarnerat asuliinnaanngitsoq, Kommune Kujallermi borgmesterip tullersortaa aatsitassanullu naalakkersuisoq isumaqarput.

- Innuttaasut piareersimappata, kommune piareersimappat una suliniut iluatseriarpat anneroorujussuarmik tunniussisinnaavoq, Jens Frederik-Nielsen oqarpoq nangillunilu:

- Neriuppugut iluatsilluarumaartoq. Utaqqimaarparput maannakkut aatsitassarsiornissamut pilersaarusiornissaq, mineplan taamak taaneqartartoq ilaallu ilanngullugit naammassineqarnissaat.

AAMMA ATUARUK Tanbreez: Suliat ilungersunartut maana aallartipput

Simon Simonsen isumaqataavoq:

- Qularinnginnatsigu nunatta kujataani inuussutissarsiornikkut annertuumik alloriarnermik kinguneqarumaassasoq. Tassami Naalakkersuisut oqarnerattut ukiorpassuarni, ila ila ukiorpassuarni ilungersuutigalugu anguniarsimasarput maani kujataani aatsitassarsiorfimmik peqalernissarput ingerlasumik, ukiuni arlalissuarni ingerlasinnaasumik, Simon Simonsen oqarpoq.

Tanbreez piiaanissamut akuersissummik ukiuni 30-ni atuuttussamik akuersissuteqarfigineqarpoq.

Aatsitassarsiornerulli aallartinneqannginnerani Killavaat Alannguata ataani kangerlummi umiarsualiviliortoqassaaq, ujaqqanillu sequtseriviliortoqassalluni, taakkulu ukiuni marlunni sanaartorneqarnissaat pilersaarutaavoq.

Tanbreezip pisortaa Greg Barnes Australiami najugaqartoq coronavirusip ilungersunartorsiortitsinera pissutigalugu peqataasinnaasimanngilaq. 

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat