Piginnittuunerminnnik qulakkeerinnikusupput

Russit umiarsuaat Qalasersuarmukartinneqarpoq. Umiarsuaq Ruslandip Qalasersuarmik piginittuuneranik qulakkeerinninniartussaavoq.
Allattoq Jaaku Lyberth
juulip 18-at 2010 12:45

Qalasersuaq ilaatigut Qallunaat Nunaannit oqartussaaffigineqarnerartarpoq.

Russit umiarsuaata ilisimatuussutsikkut misssuinermi atorneqartussap, Ruslandip qalasersuarmik piginnittuuneranik takussutissamik uppersaammik qulakkeerinnikkiartorniarpoq. Umiarsuaq ulluni 75-ini angalassaaq. Issittup imartaata naqqani Ruslandip nunavittaata killeqarfia umiarsuup misissussavaa, killeqarfiullu sumiinera qulakkiissallugu.

Immap naqqani qaqqarsuit Lomonosov-ip killingi assortuussutaapput. Issittup avannaarsuata imartaani, nunat tamat oqartussaaffigisaanni, pisuussutit naleqarluartut inissimaffiini piginnittuunerarlutik nunat assigiinngitsut oqartarnikuupput, soorlu Danmark, Canada aamma Rusland pineqartut oqartussaaffiginerarlugit oqartarnikuusut.

Issittup avannaani imartamik oqartussaanermut qinnuteqaat, Naalagaaffiit Peqatigiinnut ukioq 2013-mi tunniunneqartussaavoq.

Ruslandip imartaani qaqqarsuit Lomonosovit tunuata killeqarfii, Kalaallit Nunaata nunavittaanut atanerat uppernarsarniarlugu, Danmarkip ukioq 2014-imi Naalagaaffiit Peqatigiinnut nalunaarutigussaavaa.

Russit ilisimatuussutsikkut umiarsuaata mississuinera kinguneqarluarpat, killeqarfiillu Ruslandip nunavittaanut ataasuunerat uppernarsarneqarpat, issittup imartaa Europap kitaata angissussiatut angitigisoq Ruslandip oqartussaaffigilissaavaa.

Issittup imartaani uuliamik gassimillu peqarsinnaaneranik ilimasunneq pissutigalugu, Rusland, Canada aamma Danmark, taamatullu nunat pissaanilissuit USA aamma Kina issittup imartaani piginnittuujumalutik kissaateqarput.

Nunarsuarmi uuliaqarfiit 13 procentii issittup imartaani sumiiffinni assigiingitsuni 25-ini toqqortaatigineqartut, amerikamiut ujarassiortui naliliinikuupput, kiiisalu gasseqarfiit 30 procentii suli nassaarineqanngitsut issittup imartaniinnerarnikullutik.