Piginnittut Halibut Greenland tuniniaraat
Suliffeqarfillu qaleralinnik tunisassiornikkut iluatsitsiffiulluaraluartoq sooq tunineqartussanngornersoq oqaatigineqarsinnaanngilaq.
Halibut Greenlandip pisortaanerata Niels Thomsenip suliffeqarfiup tunineqartussanngornera aviisimut itiliiffigerusunngilaa.
Qaleralinniarnerli 2017-imi ingerlalluarpallaarsimanngilaq. Qeqertarsuup tunuani ukiup matuma qaammaataani siullerni aqqanilinni qaleralinnik tunisat, siorna piffissap taamaalinerani tunisat affaannaraat.
Tamannalu Halibut Greenlandimut ilungersunarsimavoq. Pisortaanerulli erseqqissaatigaa qalerallit pinnagit saarullinnik aalisarnerusoqarlunilu tunisisoqarnerusimasoq.
Taamaammat Halibut Greenlandip siunissaanut tunngatillugu isumalluarluni, Niels Thomsenip Sermitsiamut oqaatigaa.
- Taamaattumik pisariaqarluinnarpoq aalisartut nunamilu tunitsiviit pissutsinut nutaanut naleqqussarnissaat. Piumassuseqarnissaq tamanna atorneqarpat qalerallit ikiliartornerat siulittuutigineqartutut pitsaanngitsumik sunniuteqassanngikkaluarpoq, aviisimut taana oqarpoq.
