Piginneqqaartussaanermut inatsit nutarterusuppaat

Nunatsinni eqqumiitsuliortut taalliortullu suliniaqatigiiffissaat sapaatiummat pilersinneqaqqammerpoq.
Allattoq Nauja Møller
maajip 18-at 2010 14:01

Piginneqqaartussaanermut inatsisip nutarterneqarnissaa anguniakkanut pingaarnernut ilaavoq:

- Ilaasortaasinnaasutut takorluukkavut tassaapput isiginnaartitsisartut, nipilersortartut, atuakkiortut, filmiliortartut nunatsinnilu erinarsoqatigiissuit. Tassa taakku aallaavigalugit suliniaqatigiiffik pilersipparput, Leif Immanuelsen siulittaasutut qinerneqaqqammersoq oqarpoq.

Anguniagassanik arlaqartunik suliniaqatigiiffik nutaaq siunniussaqarsimavoq. Atuakkiortut taalliortut allallu ukiorpassuanngortuni inatsisitigut atugarliorsimapput, suliniaqatigiiffiullu anguniagassaasa pingaarnerit ilagaat piginneqqaartussaanermut inatsisip nutarterneqarnissaa:

- Ukiorpassuanngortuni inatsisitigut atugarliorpugut, inatsisitigut illersorneqarpiannginnerput peqqutigalugu. Taamaattumik uani suliniaqatigiiffittaatsinni suliuniutissatta annertuut ilagaat piginneqqaartussaanermut inatsisip misissoqqissaarneqarluni nutarteqarnissaanut tunngasut, Leif Immanuelsen oqaluttuarpoq.

Atuakkiat atuarfinni akuerisaanngitsumik naqiteqqinneqartarnerisa unitsinneqarnissaat suliniaqatigiiffiup sulissutigisassaasa ilagaat:

- Soorlu kalaallit atuakkiaat atuarfeqarfinni atorneqaraangamik, kopiiginnarneqartarput, uffali eqqortuusariaqaraluartoq atuarfiit atuagarpassuarnik pisigunik meeqqat klassimiittut tamaasa tunillugit, Leif Immanuelsen oqarpoq.

Suliniaqatigiiffik taaguuteqartoq ”Eqqumiitsuliornermik Pinngorartitsisut Ingerlatsisullu”, pilersitsiniarluni ataatsimeersuarnermi Nuummi sapaatiummat ingerlanneqartumi , pilersinneqarpoq:

- Pingaaruteqartorujussuuvoq ukiuni kingullerni eqqumiitsuliornikkut suliallit atugarisaara pitsanngorsarnissaanik suli pisariartitsisoqarnerulernerata suliniaqatigiiffiliornermut tunngaviunerpaavoq, Leif Immanuelsen naggasiivoq.

Suliniaqatigiiffiup pisortatigoortumik atissaata ilisarnaatissaatalu tamanit peqataaffigineqartumik unammissutigineqarnissaa ataatsimeersuarnermi aamma aalajangerneqarpoq.