Mittarfiit: Piginneqatigiinnissamik isumaqatigiissut Kielsenip illersoraa
Danskit naalagaaffiata Kalaallit Airports Internationalimik piginneqataanerminut atatillugu arlalitsigut itigartitsisinnaatitaanissaa Partii Naleqqap naammaginngilluinnarpaa.
Taamatulli isornartorsiuisoqarnera Kim Kielsenip paasiuminaatsippaa:
- Isumaqarpunga Partii Naleqqap oqaaseqartartuata isumaqatigiissut atuarluarnerusimassagaluaraa, Kim Kielsen oqarpoq nangillunilu:
AAMMA ATUARUK Múte isumaqatigiissut pillugu: Misilittakkat ilikkagaqarfigineqarsimanngillat
- Tassa Naalagaaffik ikinnerussuteqarluni piginneqataasussaavoq, piginneqataassutali taakkua sunaluunniit selskabimut allani ikinnerussuteqarluni piginneqataagaanni taakkunani piumasaqaatinik annerusumik naalagaaffik peqanngilaq.
Danmarkip Nunatsinni mittarfinnut aningaasaliinera
* Naalagaaffik Nuummi Ilulissanilu mittarfinnut 700 mio. koruuninik aningaasaliivoq. Naalagaaffiup taamaalilluni mittarfiit marluk 33,3 procentimik piginneqataaffigisinnaalerpai
* Den Nordiske Investeringsbankimit 450 mio. koruuninik atorniartoqarpoq, naalagaaffillu atornermut qularnaveeqqusiisuuvoq, taamaalilluni atukkanit erniat appasissinnaallutik.
* Naalagaaffik aningaasaliissutinik pisariaqartitat sinnerinut 450 millionit koruuninik erniakitsumik taarsigassarsisitsissaaq.
* Naalakkersuisut Naalagaaffillu 220 mio. koruuninik sanitigut aningaasaliipput, taakku Nunatsinni inuussutissarsiornerup ineriartortinneranut atorneqassapput.
Isumaqatigiissut aamma partiip illuatungiliuttup - Inuit Ataqatigiit – siulittaasuanit Múte Bourup Egedemit naammaginartinneqanngilaq.
Taanna isumaqarpoq danskit naalagaaffiata Air Greenlandimik piginneqatigineranik misilittakkat ilinniarfigineqarsimanngitsut.
Kim Kielsenili taama isornartorsiuisoqarneranut akissuteqarluni oqarpoq ilinniarfigineqarsimammata angusarissaarsimallutik.
- Ilaa uagut marluk pingajorarterutaa pigivarput. Taava tassani oqartussaaffik anneq pigivarput. Naalagaaffik periarfissinneqarpoq arlaatigut oqaruni kisermaassiilluni ukua ukua assigiinngitsut pingasut sisamaanngikkunik taakkua najoqqutaralugit, taakkua kisiisa najoqqutaralugit taamaallaat itigartitsisinnaalluni, Kim Kielsen KNR-imut taama oqarpoq.
AAMMA ATUARUK Pakatsinartorujussuuvoq