Piginnaanngorsaqqiineq sammivaat

Suliamik ilinniagaqarsimanngitsut piginnaanngorsarlugit ilinniartinneqartalernissaat pisariaqarluinnarpoq.

Sanaartornermik Ilinniarfimmi, Sisimiuniittumi, piginnaanngorsaqqiinissaq pikkorissarneqartarnissarlu pingaarnerutillugit isumasioqatigiittoqaqqammerpoq, pikkorissaanerit ilinniartitsinerillu pisariaqartinneqartut inassutinut pingaarnernut ilaatinneqarlutik.

Inatsisartut aningaasanut inatsisissatut siunnersuutaanni 2007-miit 2010-p tungaanut 60 millioni koruunit immikkoortinneqarsimapput, ilaatigut suliamik ilinniagaqarsimanngitsut ilinniartinneqarnissaannut, inuussutissarsiortunit pisariaqartitsineq tunngavigalugu.

Siunissaq qaninnerusoq eqqarsaatigalugu ilinniarsimasunik sulisoqarnissaq pingaaruteqartutut nalilerneqarpoq, pingaartumik aatsitassarsiornermik sulialinnut, sanaartornermillu sulialinnut.

Sulisinnaasut akornanni, inuit pingasuugaangata marluk ilinniarsimanngitsuusarput, allatulluunniit oqaatigalugu: Sulisinnaasut akornanni ilinniarsimanngitsut 26.000-it missaanniillutik.

Tamanna pissutigalugu isumasioqatigiinnermi inerniliinerit pingaarnerit tassaapput pikkorissaanerit ilinniartitsinerillu pisariaqartinneqartut, naleqquttullu piaartumik aallartinneqassallutik.