Pigaartuusoq ikkarlinnermut pisuutinneqarpoq

Royal Arctic Line-p kujataani Aapilattumit Arsuk tikillugu nioqqutissanik assartuutaata Anguteq Ittuup sapaatip-akunnerata siuliani Qaqortup kujatinnguani ikkarlummut qarsutsinerani, pigaartuusup nakkutilliisimannginnera pissutaasoq, Royal Arctic Line-meersoq Taatsiannguaq Olsen oqarpoq. Anguteq Ittuk amutsivimmi suliarineqartussanngorpoq, suliarineqangaatsiartariaqassaarlu.

Nunatsinni taamaallaat Nuummi amutsivik angallatinut taamaattunut amutsiviusinnaavoq. Taamaammat Nuummi, Islandimi, Savalimmiuni Danmarkimiluunniit suliarineqassanersoq maanna misissuiffigigitsik Taatsiannguaq Olsen oqarpoq.

Kujataani nunaqarfiit nioqqutissanik amigaateqalerpallaaqqunagit Kitaata Qeqqani angallat atorneqartoq Angaju ittuk, ataasiarluni Aapilattoq tikillugu aamma angalassaaq. Maannakkorpiarlu Anguteq Ittummut taartaagallartussamik Danmarkimit attartornissaq sulissutigineqartoq, angallallu attartugassaq kingusinnerpaamik arfininngorpat nunatsinnukarluni aallarsinnaassasoq Taatsiannguaq Olsen ilanngullugu ilisimatitsivoq.