Angutit marluk taakku malugisimaangaatsiarlutik aalisariummut inuttaaffigisaminnut unnuaqeqqata missaani ikeriaraluarlutik imaanut nilleqisumut nakkarput.
Qaqortumili pigaartup, tassa Vagtværnimi sulisup, angutit ikioqqullutik nillianerat qujanartumik tusaasinnaasimavaat, naak pigaartoq umiarsualivimmiit kilomerip affaata missaanik ungasitsigisumiikkaluarluni. Pigaartup politiit ingerlaannaq kalerrippai namminerlu umiarsualiviliarluni, qujanartumillu aamma politiit angallataanni, Sisammi, inuttat angutit marluk nakkartut takoreersimavaat.
Qatserisarfimmi sulisut ikiorsiullugit angutit qiuleqisut naatiffinnik ningitsivigineqarput, angutillu minutsini qulini/15-ini imaaneereerlutik nunamut qaqinneqarsinnaasimapput.
Qaqortup politeeqarfiani pisortap, Jack Nathansenip, pigaartoq eqeersimaarnera pillugu nersualaarpaa:
-Suleriataapallannera pissutigilluinnarlugu angutit inuunerat annaanneqarpoq, Jack Nathansen oqarpoq, oqaluttuarporlu pigaartoq ikiuuttullu allat tamaasa angutit qutsavigereeraat.