Piffissaligaanngitsumik pineqaatissiisarnerup atorunnaarsinneqarnissaa tigulluarneqarpoq

Naalakkersuisup siulittaasuata Kuupik Kleistip killiligaanngitsumik pineqaatissinneqartarnerup atorunnaarsinneqarnissaa piumasaqaatigaa.

Tamanna piffissamik killiligaanngitsumik pillakkamut ataataasup Markus Eliasenip ernermi inuunerminik allannguiniarneranut iluaqutaassangatippaa.

-Ersarittorujussuusarpoq taamatut killiligaangitsumik parnaarussaasimasup siunissani nalullugu, qanoq sivisutigisumik parnaarussaanissani toqqissisimassutigiunnaartaraa paasereerakku, piffissamik killiligaanngitsumik pillakkamut ataataasoq Markus Eliasen oqarpoq.

Taassuma ernermi misigissutsikkut nakkartarnera tikeraartarnermini maluginiartarsimava isumaqarlunilu inuttut suliarinissaraluaminut siumut takorluugassaqannginnini aporfigisaraa.

- Tarnikkut nukittuniaruni taamatut pineqarnini akiorujussuaqqaarlugu tarnikkut nukittorsinnaavoq, kisianni killiligaannginneq siumut soriarsinnaanani nalusaqarneq tarnikkut nukittorsaataanavianngilaq.

Malunnartarpoq killiligaanngitsumik parnaarussaanini nakkarsimaarutigisaraa immaqa taassumaannaanngitsulluunniit, uanga taanna malugisarpara, Markus Eliasen oqarpoq.

Taassumalu ilisimasaqarfiginerarpaa killiligaanngitsumik pineqaatissinneqarsimasut ikiaroornartunik atornerluinertik parnaarussaanerminni sakkortusisaraat.