Piareersaatit kingulliit inissipput

Aaqqissuussineq Kalaallit Nunaat Tivolimi, ukiut tamaasa aggustip aallaqqaataani pisartoq pillugu, piareersaatit kingulliit kiisami inissipput.
juunip 27-at 2011 13:27

Innersuit pillugit pisuusaartitsilluni isiginnaagassiaq, Rollespilsakademimit  aamma NAPA-mit  aningaasalerneqartoq, takutinneqartussanut ilannguppoq.

Pisuusaartitsilluni Innersuarnik oqaluttuaq Tivolimi kalaalerpalaartitsisoqarnerani ullut tamaasa nalunaaqutaq ulloqeqqaniit ualikkut pingasup akornanni Pantomime Teaterimi isiginnaartitsissutigineqartassaaq. Isiginnaartitsinermi takutinneqartassaaq kalaallit oqaluttuaatitoqaat isiginnaartitsereernerullu kingorna meeqqat inuusuttullu atisalersorlutik pinnguartinneqartassapput.

Isiginnaartitsisartoq tusagassiortorlu Vivi Sørensen ilitsersuisoralugu pinnguartoqartassaaq. Vivi Sørensenip ikiortigissavai Anders Berner aamma Lars Munck Rollespilakademiimeersut.

Taassuma saniatigut erinarsoqatigiinnik tusarnaartitsisoqartassaaq. Erinarsoqatigiit tassaapput Aqisseq, taakku Sjællandip kujataaneersut ileqqorsuutinik tusarnaartitsissapput.

Kalaallit Nunaat Tivolimi juulip 30-ani aallartissaaq aggustillu aallaqqaataani unnukkut naammassissalluni,  nipilersortartut Rasmus Lyberth, Nanook, Small Time Giants, Malu Rohmann Fleischer aamma Trommelumsen tusarnaartitsissapput.

Ukioq manna qaannamik takutitsisoqassanngilaq, tassalu taamaattoqassannginnera pissutaalluni pilersaarutit naammassineqarneq ajuleraluartut aaqqissuisunit oqaatigineqarpoq.