Martin Møller OL-imut peqataalersoq: Piareeqqavunga

Korea Kujallermi ukiuunerani OL-eqarnissaanut qaammataajunnaarpoq, ujakkaartartorlu nunatsinneersoq Martin Møller piareerluinnalernersoq paasiniarlugu silami sungiusaqatigaarput. Ujakkaartartormi tusaamasaq sungiusarluarsimanerarpoq.

Martin Møller KNR-ip tusagassiortuanit apersorneqartoq allaaserisap qulaatungaani takusinnaavat.

- Aap, piareerpunga. Qaammat kingulleq sungiusarluarpunga taamaattumik ajunngilluinnarpoq, Martin Møller oqarpoq.
 
Sotjimi 2014-imi OL-ertoqarmat Martin Møller peqataavoq. Martin Møller kingullermik unammeqataagami 15, 30 aamma 50 kilomiiterimut unammeqataavoq, fri teknikkerluni unamminermi isorartunermi normu 45-nngorluni.
 
Tamannalu unamminermini pitsaanerpaatut angusaqarfigaa, Martin Møllerilu neriuppoq Korea Kujallermi februaarip qiteqqunnerani unammersuaqartoqalerpat taamatut angusarissaarluarumaarluni.

AAMMA ATUARUK Martin Møller OL-eqarnissaanut annguppoq

OL-eqarnissaanulli inuttut pitsaanerpaamik angusaqarluarnissaq siunertarinerarpaa.
 
- Unammillunga aallartikkuma ukiuni pingasuni kingullerni pitsaanerpaamik angusaqarniarlunga sungiusarsimallunga imminut eqqaasittassaanga, taamaalillunga unamminermi inernerit kisiisa eqqarsaatiginnginniassagakkit, namminerlu anguniagaraara sapinngisara naapertorlugu unammissallunga pitsaanerpaamillu sungiusarsimassallunga, OL-eqataasussaq Martin Møller oqarpoq.
 
Sotjimi kingullermik OL-ertoqarmat Martin Møller suliffimmini suliunnaarpoq, Elite Sport Greenlandilu sinnerlugu akissarsiaqaatigalugu timersortalerluni. Ujakkaarnermilu ukiuni kingullerni sisamani sungiusarluarsimasutut misigisimavoq.

AAMMA ATUARUK Martin Møller ukiukkut OL-eqarnisssaanut piukkunnarsarpoq

- Timikkut sungiusarneq piinnarnagu, qamuuna piareersimanissaq sungiusarneruara.

Martin Møllerimi nunatta danskillu erfalasuata qalipaatai illersorlugit Koreami unammeqataasussanngorpoq.

- Tamanna uannut isumalerujussuuvoq, tungaanummi sungiusarluareerpunga. Taamaattumik piffissaqarluarlunga OL-imut anngunnera oqiliallaataavoq unammeqataanissaralu qilaanaaraara.

AAMMA ATUARUK OL-ertoqarnissaanut peqataasussaq nersornaaserneqarpoq

Unamminerit kingullersarissavaat?

- Aap tamanna naatsorsuutigaara, tassa OL VM allallu. Maanna misigisimavunga angorusutakka angullugit, ujakkaartartoq taama oqarpoq.
 
Martin Møller Østrigimut worldcupeqarnissaanut atatillugu sisamanngorpat aallassaaq, tassanngaanniillu Korea Kujallermut OL-ernissaq sioqqullugu sungiusarneq kingulleq nangikkiartussavaa.
 
Korea Kujallermi Pyeongchangimi OL-eqarnissaa februaarip ulluisa qulingiluaanni aallartinneqassaaq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat