Piaartumik aaqqiiniartoqarpoq
Siusinnerusumilli tamanna pisinnaasimagaluarpat pitsaanerussagaluartoq INI A/S-ip oqaatigaa:
- Isumaqarpunga piaartumik aaqqiisoqarsinnaassasoq. Illulli pineqartut iserterfigineqannginneranni misissussanerivut apeqqutaaginnassaaq. Januaarip 15-iata missaani imaluunniit februaarip aallaqqaataani iserterfigineqarsinnaalissasut ilimagaara, Allan Werge, INI A/S-imi immikkoortortami pisortaq oqarpoq.
Inuit marluk maannamut utaqqisut allattorsimaffianniittut taassuma oqaatigaa, atorfimmulli atatillugu inissiaassanersut, taakkununngali nuukkusuttunut inissiaassanersut oqaatigisinnaannginnerarpaa.
Siusinnerusukkulli nuuffigineqarsinnaasimagaluartut oqarpoq. Amusartut atortussaannik amigaateqartoqarnera pissutaalluni illut Panbomeersut naammassineqarsimanngitsutut taamalu iserterfigineqarsinnaanngitsutut nalilerneqartut oqaluttuarereerparput.
INI A/S-illi oqaatigaa tamanna naammanngitsoq:
- Amusartunut atortussanik amigaateqarneq apeqqutaasariaqanngilaq. Ajornartorsiutit allat pissutaasinnaapput, soorunami amusartunut atortussat atorfissaqartinneqarput, atortulli ajorpata imaassinnaavoq amusartut taarsertariaqassasut, Allan Werge oqarpoq.
Ajornartorsiutaasutut nalilerneqarsinnaasut iluarsaanneqarsinnaanissaannut illuliortitsup qulakkeertariaqarpai:
- Ataavartussamik aaqqiisoqarsinnaanissaa ammaffigaarput, illulli naammassillugillu iserterfigineqarsinnaasunngortinneqarnissaat, illunik piginnittup isumagissavaa, aserfallatsaalinissamullu aningaasartuutit nammineq nammattussaallugit, Allan Werge oqarpoq.
Illut pineqartut pillugit kommuni siusinnerusukkut saaffiginnissuteqarsimasuuppat illut iserterfigineqarsimasinnaanersut Allan Werge aperaarput, akivorlu:
- Naak illut immaqa amigaateaaraluartut illunut isertertoqarnissaa kommunip kissaatigisimasuuppagu, taava isertertoqarnissaa isumagisinnaagaluarparput, Allan Werge oqarpoq.
Illut pineqartut Panbomeersut ulluni kingullerni isornartorsiorneqarput, issittumut naleequtinnginnerat ilaatigut oqaatigineqarluni.
Taamaattoq INI A/S anusinngunngilaq.
Oqaatsuni Panbomit illuliat pillugit oqaluttualiavut nittartakkatsinni alakkartersinnaavatit, pisoq pillugu susassaqartut qisuariaataat atuarneqarsinnaallutik.
