Pia Olsen Dyhr: Sara maqaasinassaqaaq

Inuit Ataqatigiit ukiuni arfineq marlunni siulittaasorisimasaa, Kuupik V. Kleist tunuarmat, siulittaasup tullia, Aqqaluaq B. Egede siulittaasuugallartoq, Inuit Ataqatigiit immikkut ittumik nuna tamakkerlugu ataatsimeersuarneranni 35-nik taaneqarluni, Sara Olsvigimut, 37 taaneqartumut ajorsaqqarpoq.

Inuit Ataqatigiit Danmarkimi partiitut suleqataata, SF-ip siulittaasuata, Pia Olsen Dyhrip, immikkut ittumik ataatsimeersuarneq najuuffigaa.

- IA partiitut suleqatigigatsigu najuunnissara pingaaruteqarpoq. Tassami siunissami IA-p politikkikkut suna siunniunneraat ilisimassallugu pingaartippara. Nuannaarutigaaralu siulittaasunngortup, aatsitassanut tunngasut maannalu politikkikkut ingerlanneqartut isornartorsiorsinnaammagit aamma Kalaallit Nunaata namminerisamik aningaasarsiorsinnaanera siulittaasunngortup pingaartimmagu nuannaarutigalugu.

Pia Olsen Dyhrip aamma isertuunnagu oqaatigaa, Sara Olsvigi Folketingimi ilaasortat pikkorilluinnartut ilaat, ilaasortaajunnaarpat maqaasissagamiuk.

- Sara Olsvig Folketingimi ilaasortaavoq pikkorilluinnartoq, taamaattumik maqaasissaqaara, nuannaarutigaarali Inuit Ataqatigiit taama pikkoritsigisumik siulittaasoqalernerat. SF-ip siulittaasua, Pia Olsen Dyhr oqarpoq.

Sara Olsvigip sinniisaa, Johan Lund Olsen Folketingimi maanna ilaasortanngorpoq.