Pia Arke toquvoq

Allattoq Najaaraq Egede
maajip 15-at 2007 10:37

Assilialiortartoq Pia Arke, Illoqqortoormiuni 1958-imi inunngortoq Danmarkimi sivisuumik napparsimareerluni ataasinngormat unnuaani toquvoq.

Pia Arke 48-innarnik ukioqarluni toqusoq, Danmarkimi Kunstakademimi ilinniarsimasuuvoq, nunatsinni nunanilu allani saqqummersitsisarsimalluni. Ilisimaneqaatiginerpaavaa, illoqarfiup Illoqqortoormiut oqaluttuassartaa pillugu atuakkiani 2003-mi "Scoresbysundhistorier"-mik taallugu saqqummersitani.

Atuagaq Danmarkip Norgellu Tunup avannaalerngusaannerata kingunerisaanik Scoresbysund-ip illoqarfittut 1920-ikkunni pilersinneqarneranik oqaluttuartuuvoq. Inuit Ammassalimminngaanniit Illoqqortoormiunut taamani nuutsitaanerat pillugu atuakkiaanerulluni, tassami Pia Arke-p nammineq anaanami angajoqqaavi nuutsitaasunut ilaasimapput, namminerlu tappavani inuusimavoq.

Atuagaq nunaasiaateqarnerup - imminut Illoqqortoormiunilu nunaqqatiminut qanoq sunniuteqarneranik - oqaluttuartuuvoq, nammineq assiliartalersorluarsimasaa. Atuagaq Borgens Forlagimit saqqummersinneqarnikuuvoq, saqqummersitsisarfiullu aallartitsisua taannaavoq Pia Arke-p ukiorpassuarni inooqatigisaa.

Atuakkiortoq radiomilu aallakaatitassiortartoq Tine Bryld ikinngutaasutut eqqaaniummini allappoq, Pia Arkep Jarl Borgenillu inooqatigiinnerat asaqatigiinnermik killitsinnartumik, pingaartumik qaammatini kingullerni, imaqarsimasoq; nammineq ilisarisimannittullu allat puigunngisaannagassarisaannik.

Pia Arke, arnaq pinnersoq, inoqatiminik ataatsimoortitsillunilu, kaammattuillunilu inuunermik pingaartitsisoq kiisalu asanninnermik, akaarinninnermik akuersinermillu, pingaartitsisuusimavoq, ikinngutaa nangippoq.

Pia Arkep inuugallarnermini Herstedvesterimi kalaallit parnaarussat nuannaarutigeqisaannik assilialiornermik aamma ilinniartittarsimavai.

Pia Arke-p qimatarai aappani Jarl Borgen erninilu Søren, arnami piginnaasaanik kingornussaqartissimasani, Trine Bryld allappoq.