Philippinerini 600-t ajunaarsimassangatinneqarput
Philippinerini ippassaq sapaammi sakkortuumik kiattup anorersua pitoraammat inuit 600-t ajunaarsimanissaat ernummatigineqarpoq.
Allattoq Louise M. Kleemann
Nunap sisoorneratigut, qarsutsineqarneratigut angallatillu aalisariutit umiunerisigut 224-ugallartut ajunaarsimapput, Filippinerillu qiterpasinnerusortaani anorersuullu sakkortunerpaaffigisaani 374-it maanna maqaasineqartut, nutaarsiassaqartitsivik AFP nalunaarpoq.
Inuit 63.000-it qimaaffissianut qimarngusimasut oqaatigineqarpoq.
Ajunaarsimasut amerlassusaat amerleriarujussuarsinnaapput, tassami ikaartaatip 800-nik ilaasullip umiuneratigut ajunaarsimasutut maqaasineqalersut suli ilanngunneqanngimmata.