ph.D-mik ilinniagalik naammassisoq
Aqqalu Rosing-Asvid puisinut, nannunut silamullu tunngatillugu biologitut qaffasinnerusumik soraarummeeruteqaqqammerpoq. Tamaalilluni Kalaallit Nunaat Pinngortitaleriffillu pisuunnguallaqqipput.
Aqqalu Rosing-Asvidip ph.D-nngorniutini Københavnip Universitetianit illersorpaa angusilluni. Aallaaserisami qulequtaqartumi ”Kalaallit Nunaata eqqaani silap nikerarnerata natsiinut nanunullu sunniutai” – tassani uppernarsineqarpoq Kalaallit Nunaani silaannaq kissatsinnerugaangat nannut amerlanerusut pisarineqalersartut akerlianilli natsiit ikinnerusut pisarineqartarlutik.
Ph.D- mik ilinniagallit assersuusiorsinnaavavut, tassa ilisimatusartut, soorlu nakorsat ilinniaqqinniarunik nakorsaaninngorniarsinnaasut. Aqqalu Rosing-Asvid-ip ph.D-nngornera isumaqarpoq, Pinngortitaleriffimmi seniorforskeritut sulisinnaassagami, nalinginnaasumik ilisimatusartuuinnarani.
Natsernut nannunullu attuumassuteqartut sorpassuit allaaserisami qulaajarneqarput, soorlu nannut piaqqiortaasiat aamma natsiit nerisarisartagaat ilanngussorneqarlutik.
Naatsorsuusiornerit tunngavigalugit issittup kiatsinnerani nanut sooq amerlanerulersarnerat allaaserisami aamma nassuiaasiorfigineqarpoq, pingaartumik nannut ukiuni kingulliunerusuni amerlatsikkiartornerat eqqarsaatigalugu.
Kalaallit Nunaata eqqaani nannuttarineqartartut ukiuni kingulliunerusuni amerlanerulernerat nannut amerlanerulernerannik tunngaveqarnersoq maannaagallartoq oqaatigineqarsinnaanngilaq, ukiuni kingullerni kisitsisoqarnikuunngimmat.
Immikkoortortat silasiornermut attuumassuteqarnerusut allaaserisami aamma ilaapput. Sikorsuit annertussusaat, Davis Strædimi sikup annertussusaa kiisalu ukiuunerani naqitsinertuffiit ingerlaartarfiisa attuumassuteqarnerat taakkunani uppernarsarneqarpoq. Ataqatigiissutsit ukiuunerani silap qanoq ikkumaarsimaneranik siulittuiniarnernut atorneqarsinnaanerat ilimagineqarpoq – DMI-mi, tassa Danmarkimi silasiorfimmi, silaannaap pissusaanik ilisimatusartartut suleqatigalugit piffissami aggersumi tusartartut suleqatigalugit misissoqqinniarneqarpoq.
