PFA nangaalerpoq

Royaltiesilersuinissamik pilersaarutit nangaalerneranut pissutaapput.

-Royaltiesilersuisarneq eqqunneqarpat, piiaavinnut aningaasaliinissaq pilerinarpallaarunnaassaaq. Ajornakusoornerulersitsissaaq. Royaltiesilersuisoqalerneratigut Kalaallit Nunaanni piiaviinnut aningaasaliinissaq aningaasaliisut tungaannit pilerinassanngilaq, pisortaaneq Henrik Heideby oqarpoq.

Aamma australiamiut aatsitassarsiutileqatigiiffiat Tanbreez Mining, Narsap eqqaani Killavaat alannguanni aatsitassanik qaqutigoortunik piiaanissamut akuerineqarnissamik qinnuteqaqqammersoq ernumavoq.

-Suliniuterput aningaasatigut akilersinnaanngippat unitsissavarput. Taama ajornanngitsigaaq, pisortaq Greg Barnes  Berlingskemut oqarpoq.

Nunanut siuarsarniakkanut suliniaqatigiiffimmi Ibisimi siunnersortaanerup Lars Kochip Kalaallit Nunaat ullumi kaammattorpaa piiaaveqarnermut atatillugu Afrikami kukkussutaasimasut isiginiaqqullugit. Afrikami nunarpassuarni aatsitassarsiutileqatigiiffiit akileraaruteqarfigisassaminnik sinneqartooruteqarpiaratik nalunaartarput, mianersoqqusilluni oqarpoq. Kalaallit  Nunaat erseqqilluinnartunik aatsitassarsiutileqatigiiffinnut isumaqatigiissusiorsinnaanngippat royaliesilersuinissamik aaqqissuussineq pitsaanerussaaq.

-Tamanna minnerpaamik aningaasatiguit isertitaqarnissamik qulakkeerissaaq, Lars Koch Politikenimi oqarpoq.

Danskit inuussutissarsiortut ullumi katersuupput Kalaallit Nunaanni aatsitassarsiornermut aningaasaliisoqarsinnaanera pillugu ataatsimeersuarlutik. Berlingske Business aamma kukkunersiuisarfik KPMG aaqqissuisuupput ilaatigullu London Miningip pisortaanit Xiaogang Humit peqataaffigineqarluni.