Petersen: Kalaallisuinnaq tusagassiortalernissaq nalilersorneqarli

Inatsisartut ualeru ataatsimiilerunik tusagassiornikkut pissuserinnissamik ileqqorinnissamillu ineriartortitsinissamik oqallissaarut oqaluuserissavaat, tassungalu atatillugu kalaallisuinnaq tusagassiortalernissaq nalilersortariaqalersoq, oqallissaarisoq Siumut sinnerlugu Inatsisartunut ilaasortaq Per Rosing Petersen isumaqarpoq.

- Naluneqanngitsutut kalaalinngorsaaneq ukiuni kingullerni oqallisigineqartarlunilu politikkikkullu anguniarneqartariaqartoq eqqartorneqartarpoq. Tamanna toqqammavigalugu tusagassioriaatsit kalaalinngorsartariaqarnerannik oqariartuuteqarlunga oqallissaarivunga. Per Rosing Petersen nassuiaavoq.

Aamma oqarpoq, kalaallit oqaasiinut ataqqinninnerusumik tikisitanut pisussaaffiliinerulernissaq piffissanngortoq.

- Tikisitat malinnaaniarunik aamma kalaallit oqaasiinik paasinnillutillu oqalussinnaalernissaat erseqqissarneqartariaqarpoq. Erseqqissaavoq.

Nunatsinni inunngorsimasut aamma ilaqarput, kalaallisut oqalussinnaanngitsunik. Taakku qanoq oqallinnermi matumani isiginiarneqassappat ?

- Soorunami ullormit ullormut allanngorsoqarsinnaanngilaq, piffissaq aalajangersimasoq atorlugu allannguisoqartarpoq. Per Rosing Petersen erseqqissaavoq.

Assersuutitut aamma taavaa, massakkut radioavisit kalaallisut qallunaatullu sivisussuseqatigiillutik ullormut arlaleriarlutik saqqummertarnerat, tamannalu allanngortinneqarsinnaasutut isumaqarfigaa.

- Danmarkimi kalaaleqativut 10.000-it missaanniittut kalaallisut ullormut minutsinik tallimanik tusagassinneqartarput, taamaattumik nunatsinni qallunaatut akuttusuunik sivikitsunik aamma nutaarsiassaqartitsisoqarsinnaagaluarpoq. Tamakku nalilersugassat ilagisinnaavaat. Per Rosing Petersen tunngavilersuivoq.

Kalaallisuinnaq tusagassiortalernissap nalilersorneqarnissaanik Per Rosing Petersenip isummersuutai, Kalaallit Nunaata Radioani siulersuisuini siulittaasup Pollas Lyberthip isumaqatigivallaanngilai.

- Massakkorpiaq taama isikkoqartillugu akueriuminaappoq, pisortatut aallakaatitsivittut pisussaaffigigatsigu, Kalaallit Nunaanni innuttaasut tamaasa assigiimmik sullinneqarnissaat. Taamaattumik akueriuminaatsipparput. Siulittaasoq erseqqissaavoq.

Pollas Lyberth aamma isumaqarpoq, nunatsinni innuttaasut assigiinngitsunik oqaaseqartuunerat naapertorlugu, tassalu inuiaat oqaasii assigiinngitsut atorlugit ullumikkornit suli amerlanerusunik nutaarsiassaqartitsisarnissaq, allaallu tuluit oqaasii atorlugit nutaarsiassaqartalernissaa pisariaqartoq.