Peter Grønvold Samuelsen RG-imi siulittaasussatut piukkunneqarpoq

februaarip 01-at 2007 10:49

Peter Grønvold Samuelsen Royal Greenlandimi siulittaasussatut piukkunneqarpoq.

Atuagagdliutit ullumi saqqummersut taama allapput.

Peter Grønvold Samuelsen soraarnerussutisiassaqarfimmi Sisami ullumikkut pisortaavoq, aamma Air Greenlandip siulersuisuini siulittaasuulluni. Naalakkersuisunillu aperineqarsimavoq Royal Greenlandip siulersuisuini siulittaasoorusunnginnersoq.

AG-lu naapertorlugu Peter Grønvold Samuelsen akuersisimavoq.

Siulittaasutulli piukkunneqarnini Naalakkersuisut aalajangiusimassaneraat maannangaaq oqaatigisinnaannginnerarpaa.

Ataatsimeersuarneq marlunngormat pisussaagaluarpoq, piffissaligaanngitsumilli kinguartinneqarluni.

Siulittaasutulli piukkunneqartoq isumaqanngilaq piukkunneqarnini pissutigalugu ataatsimeersuarneq kinguartinneqartoq.