Peter Grønvold Samuelsen POLAROIL A/S-imi pisortanngorpoq

KNI A/S-imi ikummatissaqarnikkut pilersuinermi immikkoortoqarfik, Polaroil A/S, aggustip aallaqqaataaniit nutaamik pisortaqalissaaq. Atorfinittussaq tassaalluni Peter Grønvold Samuelsen.
Allattoq Louise M. Kleemann
maajip 16-at 2008 12:42

Pisortatut atorfimmut inuttassarsiuunneqartumut qinnuteqartut misilittagallit ilinniakkamikkullu piukkunnaateqarluartut arlalissuummata, nunani tamalaani atorfinitsitsinernik siunnersuisartumik Danmarkimiittumik siunnersortissarsiorsimallutik KNI-mit tusagassiuutinut nalunaarput. Taakkualu Peter Grønvold Samuelsen atorfimmut naleqqunnerpaatut naliliiffigaat.

Pisortatut sulineq Peter Grønvold Samuelsenimut takornartaanngilaq. Tassami maanna ukiut qulingiluassaat Sulinermik Inuussutissarsiuteqartut Soraarnerussutisiaqalernissamut Aningaasaateqarfianni SISA-mi pisortatut atorfeqareerpoq. Tamatuma saniatigut Air Greenlandip siulersuisuini ukiuni arfineq pingasuni siulittaasuusimavoq kiisalu 2007-imiit Royal Greenlandip siulersuisuini siulittaasuulluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq