Peter Brixtofte USA-mut iseqqusaangilaq

Farumimi borgmesteriusimasoq, Peter Brixtofte, arnaatinilu New Yorkimut aliannaarsaariarlutik sapaatip akunnerata naanerani tikikkamik nkanarsagaangaarput. Brixtofte, piginnaatitaaffimminik atornerluerujussuarsimasutut ukiuni marlunni parnaarussassanngortitaaqqammersoq, amerikamiut oqartussaasuinit USA-mut iseqqusaanngivippoq.

Aviisimi Danmarkimi ullormut saqqummersartumi, B.T.-mi, taama allaaserinnittoqarpoq.

Danskit SAS-ip timmisartorsuani issimasut allat tamarmik passinik misissuivikkut ajornaquteqanngitsumik akulloqquasut, Peter Brixtofte unitsitaavoq. Aappariit puaatsooqisut Atlantiku qulaallugu nalunaaquttap akunneri arfineq-pingasut-qulingiluat atorlugit Danmarkimut utiinnartariaqarput, New York, The Big Apple-mik aamma taaneqartartoq, ajoraluartumik takkuitsuuillugu.

Brixtofte ippassaanikkunni eqqartuussaareerlunilu tusagassiortunut oqarpoq, arnaatini, Nadia Alim, ilagalugu New Yorkimut ullut arlallit nuannisariarniarlutik. Brixtofte pisup kingorna nammineq oqarpoq, visumeqannginnami iseqqusaasimanani. Danskilli takornarniat USA-liassagunik visummeqartariaqanngillat, taamaallaat ullut 90-it sinnerlugit tamaaniissagunik.

Danmarkimi killeqarfimmi politiit aviisimut B.T.-mut oqamisaarput, Nrixtofte-p parnaarussaasussaanera iseqqusaannginneranut pissutaasoq.

- Danmarkimi eqqartuussaasimagaluaraanniluunniit USA-mut isernissaq nalinginnaasumik ajornarneq ajoraluarpoq, unali pisoq immikkuullarissuuvoq, killeqarfimmi politii oqarpoq.