Peter Brixtofte ukiuni marlunni paarnaaruneqassaaq
Aningaasaleeqataasartut aningaasaataannik peqquserlussimasutut Brixtofte unnerluunneqarnikuuvoq.
Politikerip saqqumilaaqisup politikkimik suliaqarnera tamaannga killeqassagunarpoq. Peqquserluutigisarsimasai qulaajarneqarlutik aallartipput aviisip B.T.-p Brixtoftep borgmesteriutilluni akileraatartut akiligaannik viinninik akusuunik imigaqartuarnera saqqummermat. Maannakkulli pineqaatissinneqarneranut pissutaasoq tassaavoq, anngiortumik aningaasaleeqataasartunik suleqateqarniartarsimanera pillugu eqqartuussiviit pingasut pineqaatissiinerat. Aningaasaleeqataasartut peqquserlulluni suleqatiginerisigut kommunip akiliutai pappiaqqatigut ersigunnaarsinniarneqartarsimapput. Suliffeqarfik aningaasaleeqataasartutut nalunaarutigineqartartoq kommunimik sullissinermini sippulimmik akilerneqartarsimavoq akitsuutillu atorlugit aningaasaleeqataasartutut aningaasat suliniutinut isertortumik isumaqatigiissutaareersunut aningaasaliissutigisarsimallugit.
Eqqartuussisunit pineqaatissinneqarnini Peter Brixtoftep angerlarsimaffimmini TV-kut isiginnaarpaa, pineqaatissinneqarninilu Inuit Pisinnaatitaaffii pillugit eqqartuussisoqarfimmut Strassbourgimiittumut suliassanngortissanerlugu eqqarsaatiginerarlugu oqarpoq.
Aviisimi BT-mi allaaserineqartoq naapertorlugu Brixtofte aamma atuakkiussamaarpoq, taannalugooq ateqassaaq: ”Pisuunngitsoq pineqaatissinneqartoq”.
