PETA: Knut issuersiuk!
Knut maanna inersimasuuvoq, nannumillu arnavissamik, ungasinngitsukkut najugaqateqalerpoq. Arnaviaq ateqarpoq Giovanna.
Nannut taakku asannilerlaaqisut illoorariittut maanna paasineqarpoq. Tamannaluuna PETA-mit qisuariarfigineqartoq. Knutip issuerneqarnissaa taakku piumasaraat, piaqqiussagaluarunimmi piaraat qanigisariinnertik pissutigalugu tuniluussinnaasumik nappaateqarsinnaapput, PETA-mi uumasut pillugit paasisimasaqarluartoq, Frank Albrecht, isumaqarpoq.
Knutilli issuertinnissaanik tusakkat Københavnimi Uumasuusivissuarmi uumasorsiuup, Bengt Holstip, qujanartumik isumaqatiginngilaa.
- Ingasattajaarneruvallaaqaaq annilaarnarlunilu, Bengt Holst oqarpoq.
Uumasorsiuup taassuma oqarnera naapertorlugu, nannup angutivissap illooqqani arnaviaq naartutileraluarpagu nannut silarsuaanni nappaammik pilersoqarnavianngilaq, aamma erseqqissaatigalugu uagut nunarsuatsinni illoorariit akuerisaasumik meeqqiorsinnaatitaasut.
Giovannip Münchenimi Uumasuusivissuarmi inaata iluarsaanneqarnerata nalaaniinnaq Giovanni Knutip inaani najugaqartussaagaluarpoq. Nannulli taakku imminnut nuannariilingaarmata najugaqatigiiginnarnissaat aalajangiunneqarpoq.
