Perumi suli ajunaarsimasunik nassaartorput
Amerika Kujalliup sineriaaniittumi Perumi nuna ippassaq sajorujussuarmat inuit 500-nit amerlanerusut ajunaarput. Illunik illorsuarnillu isasimasunik assaanermi toqusut timaat nassaariortorneqartut amerliartuinnarput.
Nunap sajorujussuarneratigut eqqugaasut pigisaminnik annaasaqartut toqusortaqartullu, oqartussaasut ajunaarnersuaqarfimmi ikiuiniarnerat naammagittaalliutigisorujussuuvaat.
Dr-ip tusagassiortua Kenneth Bengtson, illoqarfimmit Perup kitaata sineriaaniittumit Piscomit
Illoqarfik tamarmi sequmivilluni sequmissimavoq.
Ingasakkaluarpoq taama oqassalluni, tamaattormi illut 20-it. uppissimanngillat, isumaqarpunga oqaluffiit takusakka siulliit 20-it aserorlutik isamissimasut.
Soorlu massakkut nikorfaffigisanni, oqaluffissuup napasuliartai marluk kisimik napapput, sinneri tamarmik isamissimapput, tusarparalu aamma inuit 20-it tassani matoorussaanerminnit annaanneqarsimasut.
Illoqarfik Pisco Perumiittoq 120.000-nik inoqaraluarpoq, nunalli sajorujussuarnerata kingunerisaanik amiakutuannguit amerlavallaanngitsut DR-p ilanngutassiortua nalunaaruteqarpoq.
Perup præsidentia Piscomut ippassaq 5 minutsi alakkarterivoq, alaatsinaatsullu oqaatigaat ajungitsunik sorpassuarnik neriorsuuteqarsimasoq, neriorsuereeramilu ajunaarnersuaqarfiusumiit ingerlaqqissimalluni.
Nunanut allanut ministereqarfiup qallunaaq ataaseq Perumiittoq kisiat tusagaqarfigisimanngilaa, imaalluarsinnaavoq qallunaaq taanna nunap sajuffiata eqqaaniissimasoq.
Qallunaap ajunaarsimasinnaanera ilimanarpallaanngikkaluarpoq. Tallimanngormat unnukkut nunanut allanut ministeriaqarfiup qallunaat 15-it Perumiittut tusarfiginissaat amigaatigisimavai, ajunaarnersuaqarfiup nalaani angalasut.
Qallunaalli taakkua nunap sajuffianiit ungasissumiissimammata isumaalugineqanngillat qallunaarli ataaseq nunap sajuffianiissimasoq kisimi isumaalugineqarpoq.
Maannakkulli qallunaat pineqartut tamarmik qanoq innersut nalunarallarpoq imaassinnaavoq qaqqarsuarniittut imaluunniit orpippassuarni siallersarfiusuni angalaartut tamarmilli ajunnginneri aatsaat qulakkeerneqarsinnaavoq, qanoq inneri nunanut allanut ministeriaqarfiup tusagaqarfigippagit.
Angalasummi ilaquttaminnut sianerpata aatsaat erseqqinnerusumik paasisaqarfigineqarsinnaasut, Nunanut allanut ministereqarfik Ritzauip nutaarsiassaqarfianit oqartoqarsimavoq.
