Perulluliortoqarnissaanut isumannaallisaapput

TV-kkut araabiamiusut qaammataasatigoortumik aallakaatitsivimmi, Al Jazeerap nittartagaani Muuamaamik titartakkap qallunaat aviisiini naqiteqqinneqarnera pingaarnertut nutaarsiassatut ilanngunneqarpoq. Araabiamiullu aviisiata Al Hajadip aamma nittartakkamini ersarissumik nutaarsiassanut ilanngussimallugu, nutaarsiassallu siaruaakkiartornera malillugu Danmarkip nunani allani aallartitaqarfiini upalungaarsimaneq annertusiartortinneqarpoq. Algeriami Danmarkip aallartitaqarfiani atorfilik, Ole Wøhlers Olsen oqaluttuarpoq Danmarkimi nunanut allanut ministereqarfimmit upalungaarsimatitanik piareersimaqqusissummik nalunaarfigineqarsimallutik. Danmarkimi toqutsiniarsimasutut pasineqarlutik tigusaasut imaluunniit Muuamaamik titartakkap aviisini naqiteqqinneqarnera Algeriami nutaarsiassanut ilanngunneqarsimanngikaluartoq Ole Wøhlers Olsenip qallunaat nunap avinngarusimasortaani angalanaveersaaqquai. Danmarkimi tigusaasut nunamiillu anisinneqartussanngortut marluk Tunesiamiuummata Tunesiami aallartitaqarfiup ningiua, Inger Lise Ennertvig oqaluttuarpoq politiit aallartitaqarfimmik paarsisut amerlisimagitik, sulili perulluliornissamik malussarsimanatik. Syriami ukiut marluk matuma siorna aallartitaqarfimmik ikuallaasoqaraluartoq manna tikillugu aamma perulluliornissamik malugisaqarsimanngillat.