Perumi inatsisartut præsidentertik naalakkersuinermi akisussaasutut eqqartuussaatikkusukkaat
Perumi inatsisartut præsidentertik, Dina Boluarte, naalakkersuinermi akisussaasutut eqqartuunneqassasoq siunnersuutigaat.
Allagaatit nutaarsiassaqartitsiviup Reutersip pissarsiarisaani tamanna erserpoq.
Perumi sakkortuumik akerliussutsimmik takutitsisoqarpoq, maanna præsidentiusup Boluartep siuliata Pedro Castillop tigusarineqarnerata kingorna.
Akerliussutsimik takutitsisoqarnerani inuppassuit toqupput.
Castillo parnaarunneqarpoq Perumi inatsisartut atorunnaarsinniaraluarmagit peqqussutillu atorlugit aqutsinialeraluarmat.
AAMMA ATUARUK Takornarniat eqqissiviilliortoqarnerani Machu Picchumit annaanneqartut
Maanna præsidentiusoq Boluarte, Castillop præsidentiunerani præsidentimut tullersortaavoq. Dina Boluarte Catsillolu parteeqatigiikkaluarlutik, Castillop illersortaasa præsidentimut tullersortip partiimi siulittaasunngornissaa akuerinngilaat.
Maanna præsidentiusup præsidentitut tunuarniarnani erseqqissaatigereernikuuaa.
Boluartip eqqartuussivilersuunneqarnissaanut kongressimi ilaasortani saamerliuniani 20-nit amerlanerusunit atsiorneqarpoq. Taakkua præsidentiusimasumut Castillomut tapersersuisuupput.
Perumi ulluni makkunani eqqissiviilliornerit pissaaleqiffiulerput inuuussutissat benzinallu amigaatigineqaleramik.
Akerliussutsimik takutitsisut piumasaat malinniarnagit, Boluarte ippassaq pingasunngornermi oqarpoq.
