Persuttaasoq tigummigallagassanngortinneqarpoq

Nuummi Nuussuarmi meeqqeriviit ilaanni angut arnamik aapparisimasaminik ippassaq persuttaasoq eqqartuussivimmi ualeq sassartinneqarpoq.

Angut, arnamik persuttaanini pillugu, sapaatip akunnerani ataatsimi tigummigallarneqassasoq, eqqartuussisup aalajangerpaa.

Arnaq persuttarneqarami qinngamigut aappoq, kiinnamigullu kimillanneqarluni.

Meeqqat isiginnittuusimanertik pillugu kingunipilutitsinnginnissaat qulakkeerniarlugu siunnersortit inuullu pissusiinik ilisimatooq ullumi meeqqerivimmiipput.

Angut ippassaq ualikkut arnap suliffianut meeqqerivimmut isersimavoq, aapparisimasanilu persuttalerlugu, tamatumalu kingorna perorsaasut persuttaasoqarnerani kalerrisaarut toorsimavaat.

Politiit pinasuartumik meeqqerivimmukarput, takkummatali angut qimagutereersimavoq.

Kingusinnerusukkut angut nassaarineqarpoq, sapaatillu akunnera ataaseq politiit isertitsivianniittussanngorluni.

Angut siornatigut persuttaasimammat politiit angut ilisarisimalluaraat, politeeqarfimmi pisortaagallartoq, Johan Davidsen, nalunaarpoq.