Persuttaanerup atugaavallaarnera filimiliami ersersinniarneqarpoq
Ujarneq Fleischerip filmiliaa “Akiniaaneq Killeqaleraangat” Taseralimmi unnugu takuteqqaarneqassaaq. Inuiaqatigiit iluanni persuttaanerup atugaavallaarnera filimimi pingaarnertut oqariartuutigineqarpoq.
Allattoq Louise M. Kleemann
januaarip 29-at 2010 09:58
Filmi Brugsenimi Pisiffimmilu sulisut akornanni akerleriinnermik imaqarpoq. Persuttaaneq, nassuerutiginnikkumanngissuserlu filmimi sammineqartut ilagaat.
- Inuiaqatigiit iluanni persuttaanerup atugaavallaarnerata eqqumaffigineqarnerulernissaa neriuutigaara, Ujarneq Fleischer oqarpoq, ilutigalugulu neriorsuutigaa filmi illarnartunik ilaqarumaarmat.
Filmimi inuttaasut aqqaneq- marluupput peqataasullu tamarmik 60-illutik.
Ujarneq Fleischerip filmiliaata siulliup sananeqarnera taamaallaat 500 koruuninik akeqarpoq, filmiliaalu kingulleq akisunerulaassangatinneqarluni.
Nipilersoqatigiillu ”Torluut” aamma takutitseqqaarnermut atatillugu erinnamik ataatsimik appisimaassapput.
