Persuttaanerit siornamut naleqqiullugu amerlanerupput

Politiit naatsorsuigallarnerisa takutippaat, persuttaasimanermik politiinut nalunaarutiginninnerit ukiut siuliinut naleqqiullugu 2008-imi amerlanerusut.

- Pinngitsaaliilluni kinguaassiuutitigut atornerluinerit pinngitsaaleeriarnerillu ikilisimanngitsut, nalunaarutiginnittartut qimerloorutsigik paasisinnaavarput. Kisianni meeqqanik 15-init inorlugit ukiulinnik kinguaassiuutitigut atornerluisarnerit ikileriarsimapput, politimester Sten Thomsen oqarpoq.

Persuttaanerit inoqatinillu ajoqusiinerit aamma toqutsinerit toqutseriarnerillu 2007-imut sanilliullugit amerlassusii nikissimanngillat.

- Taamaattorli persuttaanerit persuttaanernillu nalunaarutiginninnerit ukioq manna amerliarsimapput. Persuttaasarnernik nalunaarutiginninnerit amerleriarsimammata, imaassinnaavoq, inuit politiinut nalunaaruteqarnissamut piareersimanerulersimasut, imaluunniit ilumut persuttasoqarnerulersimasoq, politimesteri nangippoq.

Tassalu imaassinnaavoq, siornatigut politiinut nalunaarutigineqarnissaannut mikivallaarsorisat maanna nalunaarutigineqartalersimasut.

Aqqusernermi angallannikkut inatsit nutaaq 2008-imi oktobarip qaammataani atuutilerpoq, taassumali kinguneri qanoq innersut, politiinit oqaatigissallugu maanna siusigineqarpoq. Sten Thomsen-ili isumaqarpoq, inuit amerlasuut biilertillutik isumannaallisaanermut qiterutaasaq atortalersimagaat, tamannalu kalaallit nunaanni politiit tamarmik maluginiarsimagaat.

- Aqqusinermi angallannikkut inatsit atuutilerpoq biilertut imminut eqqarsaatiginissaat pillugu tamannalu aalajangiisuulluinnarpoq. Maanakkummi aqqusinermi angallannikkut periutsit siuliinut sanilliullugit allanngorput, politimester Sten Thomsen Kalaallit Nunaanni politeqarnermi ukioq 2008 –imi pisut pingaarnerit ilaat pillugit taamatut oqarpoq.