Persuttaanerit arlallit Nuummi pisimapput

Nuummi politiit sapaatip-akunnerata naanerani ulapaarsimapput, ilaatigut eqqissiviilliortunut 13-inut persuttaanernullu arlalinnut orniguttariaqarsimallutik. Marluk eqqartuussivimmut arfininngormat sassartinneqarsimapput.
Allattoq Najaaraq Egede
januaarip 24-at 2011 11:29

Imerniartarfiit ilaannit Tugtomit tallimanngormat ualikkut tallimat qaangeraa paasoqartoq politiinut kalerriutigineqarpoq. Angut 32-nik ukiulik pukusummigut savimmik kilerneqarsimavoq, savilersortorli qimaareersimavoq. Takunnittut kinaanersoq oqaatigisinnaasimavaat, politiillu pigaartuusut angut Daddys-imiittoq arfineq-marlunngulersoq nassaaraat.

Angut 29-inik ukioqartoq tigusarineqarpoq, Nuullu Eqqartuussivianut arfininngormat sassartinneqarami sapaatip-akunnerini sisamani tigummigallagassanngortinneqarpoq. Arlaleriarluni persuttaasareersimammat tigummigallarneqarnissaa aalajangiunneqarpoq.

Inooqatini utaraa

Angut 22-nik ukiulik arfininngormat tigusarineqarpoq, inooqatiminik 20-nik ukiulimmik angerlarsimaffimminni annersaasimasutut.

Assortuunnermi angutip aappani persuttarsimavaa isimmitsarlugulu. Angut 22-nik ukiulik Nuummi Eqqartuussivimmut sassartinneqarami ulluni unnuanilu pingasuni tigummigallassanngortinneqarpoq, siornatigut arlaleriarluni persuttaallunilu sioorasaarisareersimammat. Angutip Nunatta Eqqartuussivianut ingerlateqqippaa, ippassarlu sapaammi tassani Nuup Eqqartuussiviani aalajangerneqartoq atuutiinnartussanngortinneqarpoq. Persuttaasimaneq politiit maanna misissuiffigaat aqagulu naliliiffigeqqissallugu.

Angut alla 24-nik ukiulik aapparminik persuttaasutut sapaammi tigusarineqarpoq. Arnap 28-nik ukiullip oqaluttuaraa aapparmi unnuaammat ataatsip marlullu akornanni saassutarisimagaani: nujaartuilluni, isattaalluni qimitseriaraluarlunilu.

Angut 24-nik ukiulik sapaammi unnukkut tigusarineqarpoq tigummigallarneqarnissaalu Nuup Eqqartussiviani ataasinngornermi nalunaaqutaq ataatsinut sassartinneqarami sapaatip-akunnera tigummigallarneqartussanngorpoq, suliap misissorluarneqarnissaa angullu pineqaatissinneqassanersoq piffissami tassani suliarineqassammata.

Angutip tigummigallarneqarnissani akueraa.