Persuttaaneq akiorniarlugu ataatsimeersuarneq

Nunat avannarliit arnartaasa persuttaaneq akiorniarlugu ataatsimeersuarnerat Savalimmiuni ualeru tappavani nalunaaqutaq malillugu tallimanut aallartissaaq, Savalimmiuni inunnik isumaginninnermut ministeri, Hans Pauli Strøm, ammaasuussalluni.

Qulequtarineqassaaq Arnat persuttarneqarsimasut peqqissusaat. Qimarnguinni atorfillit, piumassutitsiminnillu sulisut, ilaqutariit iluanni atornerluinernut siunnersuisarfinni sulisut, aamma inunnik siunnersuisarfiit aallartitaasa, peqataaffigisaanni, nunatsinnit peqataasoqarpoq.

Kalaallit Nunaat, Island, Norge, Sverige, Finland, Danmark Savalimmiullu peqataatitaqarput.

Ataatsimeersuarnertavia aqagu aallartippat, qulequttat, arnat timikkut tarnikkullu persuttarneqarsimasut atugaat, suleriaatsillu saqqummiunneqassapput. Arnat persuttarneqarsimasut kanngusunneq, pisuusutut misigineq, imminullu tatiginnginneq pigisaat, aamma meeraatilluni kinguaassiuutitigut atornerlunneqarsimasut inersimasunngornerminni persuttaasartumik inooqateqalersarnerat, workshopeqartitsinermi saqqummiussassat ilagissavaat.

Ataatsimeersuarneq sapaatiuppat naammassissaaq.