Perorsaasutut ilinniartitaaneq suli kinguarsimavoq

decembarip 15-at 2004 04:56

Nunatsinni perorsaasut ikippallaarput, Perorsaasunngornialli Ilinniarfik Ilulissaniittoq amerlanerusunik ilinniartoqarsinnaanngilaq. Qinnuteqartut ukiumut 80-usarput, naammasisulli 15-it missaannaanniittarput, ilinniarfimmi pisortaagallartiq Henriette Frederiksen ilisimatitsivoq.

-Naammassisartut taama ikitsigitillugit perorsaasut ilinniarsimasut naammattut aatsaat 2025-mi pigineqalersinnaapput, Henriette Frederiksen oqarpoq.

Tamannalu naammaginanngilluinnarnerarpaa. Perorsaanermut periaatsit assigiinngitsut ineriartortuarput, Danmarkimiit nunatsinnut inarluutilinnik allanillu pisariaqartitsisunik nuussuisoqarpoq akissarsiaqaatigalugulu meeqqanik paarsaqartarneq eqqunneqarpoq.

-Tamakku tamaasa sulisussaqartissagutsigik ilinniartitavut amerlanerujussuusariaqarput, Henriette Frederiksen oqarpoq.

Perorsaanermik ilinniarfik aasaanerani ukiaaneranilu ilinnialersussanik aallartitstsisalerusukkaluarpoq, atuartitsivissalli kollegianilu inissat ikippallaarput.

Pisortaagallartup oqaatigaa ilinniartitsisunut sanilliullugu perorsaasut akissarsialuppallaartut, naak ilinniartitaanerisa sivisussusaat assigiikkaluartoq, taamaammallu perorsaasut allamut ilinniaqqiliinnartartut.