Perorsaasutut ilinniarsimasut amigaataaleraluttuinnarput

decembarip 13-at 2004 14:39

Nuna tamakkerlugu perorsaasut ilinniarsimasut amigaataapput. Nuummiinnaq perorsaasutut atorfiit 114-it iluanni 32-t amigaatigineqarput.

Perorsaasut Ilinniarsimasut Peqatigiiffianni siulittaasup, Naussúnguaq Bisgaardip ilaatigut aningaasarsiat annikippallaarnerat pissutaanerpaanut ilaanerarpai.

Ilinniarsimasunik amigaateqarnermi suliffimmi atugarisat sakkortusinnaasartut soorlu kisimiilluni ilinniarsimasutut sulinermi akisussaaffik annertullunilu artornartartoq aamma Naussúnguaq Bisgaardip oqaatigaa.

Aappaagu aningaasarsiat pillugit isumaqatiginninniarnissami, perorsaasutut ilinniarsimasut aningaasarsiaasa annertuumik qaffannissaat aamma sulissutigissallugu, P.I.P-imi siulittaasoq oqarpoq.

Ukiumi nutaassami aamma perorsaasutut ilinniarsimasut nuna tamakkerlugu qasserpiaat amigaatigineqarnersut nalunaarsorneqassasut aamma P.I.P-p siulittaasua oqarpoq.