Perorsaasut suliffinut allanut nuuttarnerat nassuiaatissaqarpoq

decembarip 14-at 2004 14:46

Perorsaasutut ilinniarsimasut meeqqerivinnit suliffinnut allanut akissarsiagissaarnerusunut nuuttarnerannut pissutaavoq, suliffimmi atukkat pitsaannginnerat, kiisalu suliamut tulluuttumik aningaasarsiaqannginneq.

Perorsaasutut ilinniagalik, maannalu ilinniartitsisutut ilinniaqqissimasoq, Agnêthâraq Heilmann taama isumaqarpoq.

- Ulluinnarni sulinermi akisussaaffiit amerlasoorujussuupput annertoorujussuanngorsinnaasarlutillu. Imminut assersuutigissaguma, sulerulunneq qasunerlu atugaraakka. Akissarsiannullu naleqqutinngilluinnarluni, suliffimmillu oqinnerusumik ujaasisariaqarsimallunga, imminut eqqarsaatigisariaqarama.

Sulisut ilinniarsimanngitsut ingerlaqqinnissaannut periarfissinneqarnerusariaqartut, Agnêthârak Heilmann oqarpoq.

Aamma oqarpoq ilinniartitsisutut sulinermini, perorsaasunik ilinniarsimasunik sulisussaaleqinerup kingunerisaanik, meeqqat atualernerminni piginnaasassatik ilaatigut pigineq ajoraat malugisinnaallugu.