Perorsaasut nakuuserfigineqartarlutillu qunusaarneqarnerusalerput

Nunatsinni meeqqanut inuusuttunullu ulloq unnuarlu angerlarsimaffinni quliusuni perorsaasut annertuneruleriartortumik nakuuserfigineqartalerput qunusaarneqartalerlutillu.

Sullivimmi avatangiisit sakkortusaarfiujartuinnarnerat akiorniarlugu Nuummi Røde Kors Børnehjemmimi pisortaq, Hans Wiechmann, sakkortuumik upernaaq alloriarpoq. Sulisut pikkorissariartortippai aaqqiagiinnginnerit qanoq qaangerniarneqartarnissaannut imminut illersornissamik ilaatigut sungiusaanertalimmik, AG ullumi saqqummersoq allappoq.

Perorsaasut ilinniarsimasut peqatigiiffianni, PIP-mi, siulittaasup, Nâssúnguaq Bisgaardip sulisut imminnut illersornissaminnut immikkut pikkorissartinneqarsimanerat paasilluarsinnaanerarpaa.

- Ulloq unnuarlu angerlarsimaffiit sulliviupput sakkortoorujussuit. Aporaannermik nalaataqaraangamik angerlarsimaffimminni atornerluineq misigisimasartik pissutigalugu nakuuseqqajaanerusarput, Nâssúnguaq Bisgaard AG-mut oqarpoq.