Perorsaasut: Kommuni unioqqutitsissaaq

Kommuneqarfik Sermersuumi ulluunerani meeqqanut paaqqinnittarfinnut tunngatillugu nalunaarusiami innersuussutigineqarpoq, amigaateqarneq tunngavigalugu sulisut nussorneqartassasut, meeraaqqerivinniittullu marlunnik ukioqaliinnarlutik meeqqerivinnut nuuttalissasut.

Taamaaliornikkut meeqqerivinni inissaritinneqartut atorluarneqarnissaat nalunaarusiami allassimavoq.

Taamaaliortoqalissappalli Namminersorlutik Oqartussat Perorsaasut Kattuffiatalu tunngaviusumik isumaqatigiissutaanik unioqqutitsinerussasoq, Perorsaasut Kattuffianni siulittaasoq Kaaliina Skifte naliliivoq:

- Taama pisoqassappat tunngaviusumik isumaqatigiissuterput unioqqutinneqassaaq, naqissusiivoq.

Kommuneqarfik Sermersuup ulluunerani paaqqinnittarfinnut tunngatillugu nalunaarusiaani siunnersuutit akuerineqassappata unioqqutitsinerussasoq, Kaaliina Skifte isumaqarpoq.

- Namminersorlutik Oqartussanut isumaqatigiissuterput suliffeqarfinni sulisut atugarissaarnissaannut tunngasoq erseqqissorujussuarmik takussuseereerpoq, tassanimi allaqqavoq suliffeqarfimmi sulisitsisut sulisullu toqqissillutik sulinissaat isumagineqassasoq. Perorsaasutulli atorfillit meeqqerivinnut assigiinngitsunut nuttartinneqartalissappata isumaqatigiissut unioqqutinneqassaaq, Kaaliina Skifte erseqqissaavoq.

Meeqqerivinnut inuttassanik amigaateqartunut perorsaasunik nussuisarnissamik siunnersuut Kaaliina Skiftep isornartoqartippaa, oqarluni meeqqat paaqqutarineqarnerat isumagineqarnerallu ajorseriassasoq. Aammalu sullivimmi toqqissisimannginnermik kinguneqartitsissasoq, Kaaliina Skiftep tikkuarpaa.

-Perorsaasut atorfinitsinneqaraangamik atorfimmut ataatsimut inissinneqartarput. Nuutsinneqaqattaarniarunik soorunalimi 100 procentimik tunniusimallutik sulinavianngillat, naqissusiivoq.

Meeqqat marluinnarnik ukiullit meeraaqqerivinniit meeqqerivinnut pisalernissaat Kaaliina Skifte-p aamma isornartoqartippaa.

Meeqqat pisariaqartittagaat ilaatigut tassaanerarpai; oqalussinnaaneq, timip pitsaasumik atornissaa, pinnguarneq aamma inoqatinut qanittuuneq misigissutsinullu tunngasut, taakku tamarmik meeqqap ineriartorneranut sunniuteqartartut. Kaaliina Skifte isumaqarpoq, Inatsisartut maleruaqqusaanni aallassimareersoq, meeqqat marlunnik ukiullit meeqqerivinnut nuunneqarsinnaanerat piumasaqaataanngitsoq.

- Soorunalimi perorsaanerup tungaatigut meeqqat ineriartornerat attorneqartorujorujussuussaaq. Kingunerisassai takorloorneqarsinnaapput, meeqqammi ilai toqqissisimanngikkunik ukiualunnguit qaangiunnerini perorsaasunut annerusumik suliassanngussammata, PIP-p siulittasasua oqarpoq.

Meeqqat mikinerit meeqqerivinnut pisalernissaat aamma perorsaasut nuuttartinneqartarnissaat Kommuneqarfik Sermersuumi kommunalbestyrelsep tapersersorpaa. Kommunalbestyrelselli tapersersunngilaa, meeqqerivinni ataasiakkaani meeqqat amerlassusissaanik qaangiissarneq.